‘मध्य वैतरणा’ ९० टक्के भरले

‘मध्य वैतरणा’ ९० टक्के भरले

धरणाचे तीन दरवाजे खुले; गावांना सावधानतेचा इशारा

सकाळ वृत्तसेवा
मुंबई, ता. ७ : मुंबईला पाणीपुरवठा करणाऱ्या सात तलावांपैकी मध्य वैतरणा धरण आज सुमारे ९० टक्‍के भरले आहे. सतत कोसळणाऱ्या पावसामुळे धरणाचे तीन दरवाजे दुपारी सव्वाएक वाजता सेंटीमीटरने उघडण्‍यात आले. यामुळे नदीकाठच्या गावांना सावधानतेचा इशारा देण्यात आला आहे.

या जलाशयाची पूर्ण भरण्याची पातळी २८५ मीटर असून ती २८२.१३ मीटरपर्यंत पोहोचली आहे. मध्य वैतरणा जलाशयाची कमाल पाणीसाठवण क्षमता ही १९,३५३ कोटी लिटर इतकी आहे. खबरदारीचा उपाय म्हणून तीन हजार क्युसेक वेगाने विसर्ग सुरू करण्यात आला आहे. या धरणातून सोडण्यात येणारे पाणी मोडक सागर जलाशयात साठवण्यात येते.
---
सात धरणांत ६७.८८ टक्के जलसाठा
सात धरणांची कमाल पाणीसाठवण क्षमता १,४४,७३६.३ कोटी लिटर आहे. आज पहाटे सहा वाजता मोजणीनुसार सर्व सात तलावांत मिळून सुमारे ६७.८८ टक्के इतका जलसाठा उपलब्ध झाला आहे, अशी माहिती जलअभियंता विभागाने दिली.
-------------