दोन महापालिका अधिकाऱ्यांना नोटीस

दोन महापालिका
अधिकाऱ्यांना नोटीस 

सकाळ वृत्तसेवा
मुंबई, ता. ७ : न्यायालयाने तोंडी आदेश दिले असताना तसे आश्वासन देऊनही दुसऱ्याच दिवशी याचिकाकर्त्याच्या घरावर पाडकामाची कारवाई करणाऱ्या महापालिकेच्या अधिकाऱ्यांना उच्च न्यायालयाने कारणे दाखवा नोटीस बजावली आहे. तसेच अवमान कारवाई का करू नये, त्याबाबत भूमिका स्पष्ट करण्याचे आदेश दिले. 
ताडदेव येथील पुनर्विकास प्रकल्पात कायमस्वरूपी पर्यायी निवासस्थानासाठी पात्र ठरणाऱ्यांच्या यादीत समाविष्ट करावे आणि २०१८ मध्ये प्रसिद्ध केलेले सुधारित इरादापत्र रद्द करण्याच्या मागणीसाठी याचिकाकर्ते सागर नार्वेकर यांनी याचिका केली होती. महापालिका अधिकाऱ्यांच्या पाडकामाच्या कारवाईमुळे याचिकाकर्ते रस्त्यावर आल्यावरून न्या. बर्गिस कुलाबावाला आणि न्या. फिरदोश पुनीवाला यांच्या खंडपीठाने पालिका प्रशासनाला धारेवर धरले. महापालिका अधिकारी वैभव दत्तात्रय मस्करे आणि त्यांचे वरिष्ठ सचिन प्रकाश महाजन यांना न्यायालयाने कारणे दाखवा नोटीस बजावून त्यांच्यावर अवमान कारवाई का केली जाऊ नये, याबाबत स्पष्टीकरण देण्याचे आदेश दिले. त्यावर याचिकाकर्त्याला तात्पुरता दिलासा म्हणून भायखळ्यातील संक्रमण शिबिरात खोली उपलब्ध केल्याची माहिती महापालिकेने न्यायालयाला दिली. कारवाईबाबत निषेध नोंदवून ताडदेव येथील पुनर्विकास प्रकल्पात कायमस्वरूपी पर्यायी निवासस्थान मिळवण्याचे हक्क रद्द न करण्याच्या अटीवर याचिकाकर्त्याने ही खोली स्वीकारण्यास सहमती दर्शवली.