तरुणीच्या गाडीला मद्यधुंद अवस्थेत धडक

तरुणीच्या गाडीला
मद्यधुंद अवस्थेत धडक
मनसेच्या पदाधिकाऱ्याच्या मुलावर गुन्हा
सकाळ वृत्तसेवा
मुंबई, ता. ७ : मनसेचे प्रदेश उपाध्यक्ष जावेद शेख यांचा मुलगा राहील शेखने (२७) रस्त्यावर मद्यधुंद अवस्थेत सोशल मीडिया इन्फ्लुएन्सर राजश्री मोरेंच्या गाडीला धडक देऊन शिवीगाळ केली. अंधेरी भागात घडलेल्या या घटनेचा व्हिडिओ व्हायरल झाला आहे. आज त्याच्या चौकशीला बोलावण्यात आले होते.

अंबोली पोलिसांनी तरुणीच्या तक्रारीवरून शेखविरुद्ध गुन्हा नोंदवला आहे. वर्सोवा परिसरात राहणाऱ्या मोरे यांच्या तक्रारीनुसार, रविवारी मध्यरात्री दीडच्या सुमारास कारने घरी जात असताना अंधेरीच्या वीरा देसाई रोड परिसरात ही घटना घडली. मोरे यांच्या वाहनाला धडक दिल्यानंतर तो निघून गेला. त्यानंतर तरुणीने त्याला अडवून जाब विचारला. या वेळी पोलिसांच्या मदतीने त्याला बाहेर येण्यास सांगितले. तेव्‍हा त्याने मोरे यांच्यासोबत वाद घालून गाडीचे नुकसान झाले असल्यास माझ्या बापाकडून पैसे घे, असे म्हणत शिवीगाळ  केली. या वेळी त्याने पोलिसांनाही माझा बाप मनसेचा राज्य उपाध्यक्ष असल्याचे सांगून दम भरला. अंबोली पोलिसांनी राहीलविरुद्ध गुन्हा नोंदवून त्याला ताब्यात घेतले. त्यानंतर त्याला नोटीस देऊन सोडण्यात आले. त्याच्या मद्यचाचणीसाठी नमुने न्यायवैद्यक प्रयोगशाळेत पाठवण्यात आले आहेत. सोशल मीडिया एन्फ्लुएन्सर राजश्री मोरे यांच्यासोबत घडलेला हा प्रकार त्यांनी इन्स्टाग्रामवर व्हिडिओद्वारे शेअर केला आहे. राहील रात्री अंधेरी भागातच बाहेरून आलेल्या मित्रांसोबत पार्टीसाठी आला होता. पार्टी उरकून घरी जात असताना ही घटना घडली.
-----
पूर्वनियोजित असल्याचा दावा
राजश्री यांनी ही घटना पूर्वनियोजित असल्याचा दावा केला आहे. काही दिवसांपूर्वी त्यांनी हिंदी-मराठीच्या वादात उडी घेऊन मराठी भाषेबाबत वादग्रस्त वक्तव्य केल्याने त्यांना लक्ष्य केल्याचे म्हटले आहे.