वादग्रस्त फलक पोलिसांनी हटवला

वादग्रस्त फलक पोलिसांनी हटवला
ठाण्यात युवासेनेचे कार्यकर्ते आक्रमक

सकाळ वृत्तसेवा
ठाणे, ता. ७ : हिंदीसक्तीचा शासन निर्णय रद्द झाल्यानंतर शिवसेना उद्धव बाळासाहेब ठाकरे पक्ष व महाराष्ट्र नवनिर्माण सेनेने विजय जल्लोष साजरा केला. त्यानंतर टेंभी नाका परिसरात शिवसेना शिंदे गटाकडून उद्धव ठाकरे गटाला डिवचणारा फलक लावण्यात आला होता. यावर वाद वाढू नये, याकरिता सोमवारी (ता. ७) ठाणे पोलिस व पालिका प्रशासनाकडून हा फलक हटविण्यात आला, मात्र या वेळी युवासेनेचे कार्यकर्ते आक्रमक झाले होते.

हिंदीसक्तीच्या विरोधात राज ठाकरे यांनी आक्रमक पवित्रा घेत, विरोध दर्शविला होता. त्यात सरकारने हिंदीसक्तीचा शासन निर्णय रद्द केला. त्यानंतर वरळी येथे शिवसेना (ठाकरे गट) आणि मनसेकडून याबाबत विजय मेळाव्याचे आयोजन करण्यात आले होते. या मेळाव्यात उद्धव ठाकरे आणि राज ठाकरे एकत्र येत संभाव्य युतीचे दिले व ‘मराठी माणसाची एकजूट’ हा नारा दिला. त्यानंतर युवा सेनेने विनोदी शैलीत टेंभी नाका परिसरात विनोदी शैलीच उद्धव ठाकरे यांच्यावर टीका करणारा मोठा फलक लावण्यात आला, ज्यामध्ये उद्धव ठाकरे यांचा चित्र, मुंबई महापालिकेची तिजोरी आणि महापौरांची खुर्ची दाखवण्यात आली होती. यावरून वाद होण्याची शक्यता निर्माण झाल्याने स्थानिक पोलिस आणि महापालिकेच्या अतिक्रमणविरोधी हा फलक हटवण्याची कारवाई सुरू केली. या वेळी शिवसेना (शिंदे गट) युवा सेनेचे कार्यकर्ते आक्रमक झाल्याचे दिसून आले. त्यामुळे टेंभी नाका परिसरात काही काळ तणावाचे वातावरण निर्माण झाले होते.

यापुढे जशाचं तसे उत्तर!
‘टेंभी नाका परिसरात आक्षेपार्ह फलक लावण्यात आला होता. यापुढे फलकाला उत्तर फलकानेच दिले जाईल. त्यातून कोणाच्या भावना दुखावल्या गेल्या तर ती आमची जबाबदारी नसेल.’ असा इशारा शिवसेना उद्धव बाळासाहेब ठाकरे पक्षाचे प्रवक्ते अनिश गाढवे यांनी सोमवारी ठाण्यात एका पत्रकार परिषदेत बोलताना दिला. या फलकाबाबत ठाणे पोलिस आयुक्त आणि ठाणे नगर पोलिस ठाण्याला निवेदन देण्यात आल्याची माहिती देण्यात आली.