अबू सालेमला दिलासा देण्यास नकार

अबू सालेमला दिलासा देण्यास नकार
शिक्षेचा कालावधी अद्याप अपूर्ण : न्यायालय

सकाळ वृत्तसेवा
मुंबई, ता. ७ : १९९३च्या साखळी बॉम्बस्फोटप्रकरणी गुंड अबू सालेम जन्मठेपेची शिक्षा भोगत आहे. पोर्तुगालच्या प्रत्यार्पण अटींनुसार आवश्यक असलेली २५ वर्षे तुरुंगवासाची शिक्षा पूर्ण झालेली नाही असे सांगत सोमवारी उच्च न्यायालयाने त्याची सुटकेची विनंती फेटाळली.

सालेमने निर्धारित शिक्षेची मुदत पूर्ण झाल्याचा दावा करून सुटकेसाठी १० डिसेंबर २०२४ रोजी केलेला अर्ज मुंबईतील विशेष टाडा न्यायालयाने फेटाळली होती. त्यानंतर त्याने उच्च न्यायालयात धाव घेतली होती. त्यावर न्या. अजय गडकरी आणि न्या. राजेश पाटील यांच्या खंडपीठाने सोमवारी झालेल्या सुनावणीदरम्यान सालेमला दिलासा देण्यास नकार दिला. या वेळी सर्वोच्च न्यायालयाच्या निकालानुसार, सालेमच्या अटकेची तारीख १२ ऑक्टोबर २००५ नोंदवण्यात आली आहे. २५ वर्षे तुरुंगवास पूर्ण झाल्यानंतर केंद्र सरकार माफीच्या अधिकारांचा वापर करण्यास आणि अर्जदाराची सुटका करण्यास बांधील आहे. तथापि, प्रथमदर्शनी सालेमची २५ वर्षांची तुरुंगवासाची शिक्षा अद्याप पूर्ण झालेली नाही, असे निरीक्षण न्यायालयाने नोंदवले.

शिक्षा, अंडरट्रायल म्हणून घालवलेला कालावधी आणि मिळवलेल्या माफीचा समावेश हा कार्यकाळ २५ वर्षांपेक्षा जास्त आहे. याचिकेनुसार २४ डिसेंबर २०२४ पर्यंत दोन प्रकरणांत शिक्षेची बेरीज करून एकूण २५ वर्षांहून अधिक तुरुंगवास भोगल्याचा दावा सालेमने केला आहे. यावर सालेमने वेगवेगळ्या प्रकरणांत तुरुंगवासाचा कालावधी, अंडरट्रायल म्हणून घालवेला वेळ यांचा एकत्रित समावेश केल्याचे अतिरिक्त सॉलिसिटर जनरल अनिल सिंग यांनी खंडपीठाचे लक्ष वेधले. त्यांचा युक्तिवाद ग्राह्य धरून न्यायालयाने सालेमची मागणी फेटाळून लावली.