निष्काळजीपणामुळे पलावा पुलावर अपघात

निष्काळजीमुळे पलावा पुलावर अपघात
जिल्हाप्रमुख दीपेश म्हात्रे यांची टीका
सकाळ वृत्तसेवा
डोंबिवली, ता. ८ : कल्याण-शिळ रस्त्यावरील नवीन पलावा पुलाच्या उद्घाटनानंतर त्यावर दोन दुचाकीस्वारांचे अपघात झाले. हे अपघात निष्काळजी आणि राजकीय गाफीलपणामुळे होत आहेत. त्याविरोधात आम्ही कायदेशीर लढा देणार आहोत, अशी माहिती ठाकरे गटाचे जिल्हाप्रमुख दीपेश म्हात्रे यांनी दिली. कल्याण परिमंडळ-३ चे पोलिस उपायुक्त अतुल झेंडे यांची भेट घेत त्यांनी निष्काळजी करणाऱ्यांविरोधात गुन्हे दाखल करावेत, असे निवेदन दिले. पोलिस उपायुक्तांनी याची सखोल चौकशी करू, असे आश्वासन शिष्टमंडळाला दिले.

कल्याण-शिळ रोडवर देसाई खाडी ते काटई नाका अशी नवीन पलावा पुलाची उभारणी केली आहे. या पुलाचे शिवसेना शिंदे गटाने उद्घाटन करत पूल वाहतुकीसाठी खुला केला; मात्र काही वेळातच या पुलावर अपघात झाले आणि पूल वाहतुकीसाठी बंद केला. या अपघातावरून विरोधी पक्षांनी शिवसेना शिंदे गटाला धारेवर धरले आहे. समाजमाध्यमातदेखील यावर जोरदार टीका होत आहे. यातच दीपेश म्हात्रे व त्यांच्या शिष्टमंडळाने सोमवारी (ता. ७) कल्याण परिमंडळ-३ चे पोलिस उपायुक्त अतुल झेंडे यांची भेट घेत त्यांना निवेदन दिले.

शिवसेनेने दिलेल्या निवेदनात म्हटले आहे की, पुलाचे काम अपूर्ण असूनही श्रेयवादासाठी उद्घाटनाचा सोहळा पार पाडण्यात आला. पुलाचा रस्ता निसरडा असून, त्यामुळे अपघात घडले आहेत. संबंधित अधिकारी, बांधकाम कंत्राटदार आणि सत्ताधारी पदाधिकारी यांनी निष्काळजी दाखवून नागरिकांच्या जीविताला धोका पोहोचवला आहे. जर ‘काम पूर्ण झाल्याचे’ खोटे प्रमाणपत्र दिले असेल, तर कंत्राटदारावर गुन्हा दाखल व्हावा, अशी स्पष्ट भूमिका निवेदनात घेण्यात आली आहे. या गंभीर प्रकरणाची तातडीने आणि निष्पक्ष चौकशी करून दोषींवर कडक कारवाई करावी, अशी मागणी करत शिवसेनेच्या शिष्टमंडळाने पोलिस उपायुक्तांकडे याचा पाठपुरावा करण्याची मागणी केली.