धबधब्यांच्या पाण्याचा डोळ्यांना धोका

ठाणे शहर, ता. ८ (बातमीदार) : पावसाळ्यात धबधब्यांच्या ठिकाणी जाणाऱ्या पर्यटकांना आरोग्य विभागाकडून काळजी घेण्याचे आवाहन करण्यात आले आहे. अशा ठिकाणी जाणाऱ्यांना डोळ्यांच्या संसर्गाचा धोका अधिक असल्याचे नेत्र तज्ज्ञ डॉक्टरांचे म्हणणे आहे. ठाणे आणि इतर शहरांतील पर्यटक मोठ्या संख्येने भटकंतीसाठी डोंगरदऱ्यांकडे वळत आहेत. अतिउत्साहाच्या भरात पर्यटकांच्या डोळ्यांना नुकसान पोहचू शकते.
शहापूर, मुरबाड, माथेरान, लोणावळा भिवपुरी, कसारा, वज्रेश्वरी, टिटवाळा आदी ठिकाणी निसर्गरम्य धबधब्यांनी पर्यटकांना वेड लावले आहे. मात्र, या निसर्गसौंदर्याचा आनंद घेताना आरोग्याचे, विशेषकरून डोळ्यांचे गंभीरतेने भान ठेवण्याची गरज आहे. डोळे हे शरीरातील सर्वांत नाजूक आणि संवेदनशील अवयवांपैकी एक आहे. पावसाळ्यात संसर्गाचा धोका अधिक असतो. त्यामुळे भिजताना धबधब्याखाली उभे राहताना डोळ्यांची काळजी घेणे अत्यंत आवश्यक असल्याचे नेत्र तज्ज्ञांनी स्पष्ट केले आहे.

गंभीर आजारांचे संकेत
धबधब्याचे पाणी किंवा पावसाचे साचलेले पाणी डोळ्यांत गेल्यास बॅक्टेरिया, विषाणू किंवा जंतूंचा संसर्ग होऊ शकतो. त्यामुळे डोळ्यांत खवखव, लालसरपणा, डोळे चुरचुरणे, पाणी येणे यांसारख्या तक्रारी निर्माण होऊ शकतात. काही वेळा हे लक्षण गंभीर आजारांचे संकेतही असू शकतात, अशी माहिती जिल्हा रुग्णालयाच्या नेत्र तज्ज्ञ डॉ. शुभांगी अंबाडेकर यांनी दिली.

पावसात भिजल्यानंतर डोळे स्वच्छ आणि कोरड्या कापडाने पुसावेत, डोळ्यांत खाज येत असल्यास हाताने चोळू नये, धबधब्याखाली उभे राहताना डोळ्यांवर चष्मा किंवा रुमाल ठेवावा. कोणतीही जळजळ, सूज किंवा अस्वस्थता वाटल्यास तातडीने डॉक्टरांचा सल्ला घ्यावा.
- डॉ. शुभांगी अंबाडेकर, नेत्र तज्ज्ञ, सिव्हिल रुग्णालय

सह्याद्रीतील सौंदर्य अनुभवणे हा एक अविस्मरणीय अनुभव असतो. पण त्यासाठी आरोग्याची तडजोड करणे टाळावे. डोळ्यांप्रमाणेच त्वचा, पायांचे तळवे, पाचनसंस्था यांचीही योग्य निगा राखणे गरजेचे आहे.
- डॉ. कैलास पवार, ठाणे जिल्हा शल्य चिकित्सक