पालिकेच्या माध्यमिक शाळांमध्ये संकल्प समारंभ

बदलापूर, ता. ८ (बातमीदार) : कुळगाव बदलापूर नगर परिषदेच्या कुळगाव मराठी एरंजाड व बेलवली माध्यमिक शाळांच्या दहावीची तुकडी करणे, अभ्यासाच्या नियोजनात अभ्यास कसा करावा? पेपर पॅटर्न आणि त्या अनुषंगाने येणाऱ्या विद्यार्थ्यांच्या समस्यांसाठी मराठी व विज्ञान विषयाची संकल्प कार्यशाळा झाली. या कार्यशाळेसाठी मुंबईतील सायन येथील धर्मप्रकाश श्री निवासय्या हायस्कूल येथून शिक्षकांनी विद्यार्थ्यांना मोलाचे मार्गदर्शन केले.

कुळगाव बदलापूर नगर परिषदेच्या शाळांमध्ये दहावीच्या विद्यार्थ्यांसाठी प्रत्येक अभ्यास शिबिर १२ तासांचे घेण्यात आले. यासाठी मुंबईतील प्रसिद्ध सायन येथील डी. एस. हायस्कूलमधील व्याख्यात्या मराठी विषय तज्ज्ञ डॉ. नयना लोखंडे आणि विज्ञान विषय तज्ज्ञ सुनीता दरेकर यांचे दहावीच्या विद्यार्थ्यांनी अभ्यास कसा करावा? पेपर कसा सोडवावा? तसेच इतर मौलिक मार्गदर्शन मिळाले. या वेळी विद्यार्थ्यांनी अनेक शंका, प्रश्न विचारून विज्ञान आणि मराठीमधील अनेक संकल्पना स्पष्ट करून घेतल्या. विद्यार्थ्यांनीही मार्गदर्शनामुळे आम्हाला मराठी आणि विज्ञान विषयाची गोडी लागली आहे. आम्ही जास्तीत जास्त गुण मिळवण्याचा प्रयत्न करू, असा संकल्प केला. हे दोन्ही संकल्प समारंभ कुळगाव पीएम श्री शाळा आणि पर्यावरणपूरक शाळा एरंजाड येथे झाला. दोन्ही समारंभासाठी मुख्याधिकारी मारुती गायकवाड आणि शिक्षण विभागप्रमुख जितेंद्र गोमासे यांनी विद्यार्थ्यांना शुभेच्छा दिल्या. या वेळी मुख्याध्यापिका सुरेखा राऊत, निवेदिता धनगर, केंद्रप्रमुख सुभाष सोलसे, कैलास जामनिक यांचे मोलाचे सहकार्य मिळाले.