सोसायट्यांच्या परवानगीविना स्मार्टमीटरची जोडणी

बदलापूर, ता. ८ (बातमीदार) : सध्या बदलापूर शहरात स्मार्ट टीओडी मीटर लावण्याचे काम सुरू आहे. यासाठी सरकारी नियम धाब्यावर बसवून ठेकेदार कंपनी सोसायट्यांमध्ये कोणतीही पूर्वसूचना किंवा प्रत्यक्ष सूचना न देता, मीटर रूममध्ये परवानगीशिवाय जुने मीटर बदलून नवे टीओडी स्मार्ट मीटर बसवण्याचा प्रकार सुरू आहे. या संदर्भात अनेक ग्राहकांनी महावितरण कार्यालयात तक्रार सादर केली आहे.
बदलापूर शहरात वीजग्राहकांना काहीही न कळवता, जुने मीटर खराब असल्याचे कारण दाखवून सर्रास बदलले जात आहेत. याबाबत अनेक वीजग्राहकांकडून महावितरण कार्यालयात तक्रारी दाखल झाल्या आहेत. मीटर बदलताना सबंधित ग्राहकाची कोणतीही संमती घेतली जात नाही. कंपनीचे कर्मचारी सोसायटी, घरे, छोट्या इमारतींमध्ये जाऊन कोणतीही सूचना न देता, सोसायटीमध्ये नोंदवहीत प्रवेश नोंद न करता, सुरक्षारक्षकाला न जुमानता थेट मीटर बसवत आहेत. त्यातही एखाद्या जागरूक वीजग्राहकाने या कर्मचाऱ्यांना अशी सक्ती का? आणि याची पूर्वसूचना का दिली जात नाही याची विचारणा केली असता, ‘वीजबिल कमी आल्याची माहिती कधी वीजग्राहक आमच्याकडे देतात का?’ असे उत्तर ठेकेदार कंपनी कर्मचाऱ्यांकडून दिले जाते.

दोन दिवसांपूर्वी आमच्या मोठ्या गृहसंकुल सोसायटीमध्ये ठेकेदार कंपनीचा कर्मचारी सोसायटी सुरक्षेचे नियम न पाळता सर्रास जुने मीटर बदलून नवा मीटर लावत होता. हे पाहिल्यावर त्याला प्रश्न केला असता, त्याने मी महावितरणचा कर्मचारी असल्याचे सांगितले. याबाबत स्पष्टीकरण देण्यासाठी त्याच्याकडे कोणतेही ओळखपत्र नव्हते. उलट उद्धट उत्तर कर्मचाऱ्याने दिले. याबाबत तक्रार देण्यासाठी महावितरण कार्यालयात गेलो असता, त्यांनी असे कोणतेही कर्मचारी आम्ही पाठवत नाही त्यांची शहानिशा केल्याशिवाय त्यांना सोसायटी आवारात घेऊ नये, असे पश्चिमेकडील महावितरण कार्यालयातील अधिकारी चौधरी यांनी सांगितले.
- विजय गायकवाड, त्रस्त, वीजग्राहक

नाव ओळख न सांगता सोसायटी आवारात शिरणाऱ्या अशा कर्मचाऱ्यांवर वीजग्राहकांनी आक्षेप घ्यावा. अशा कर्मचाऱ्यांची तक्रार आमच्याकडे द्यावी. आम्ही असे कोणतेही कर्मचारी ग्राहकांना न कळवता पाठवत नाही. वीजमीटर बदलण्याची कोणतीही सक्ती महावितरण करत नाही.
- विजय दूधभाते, जनसंपर्क अधिकारी कल्याण विभाग