पलावा पुलावरून आरोप प्रत्यारोपांच्या फैरी

पलावा पुलावरून आरोप-प्रत्यारोपांच्या फैरी
सकाळ वृत्तसेवा
डोंबिवली, ता. ८ : कल्याण-शिळ रस्त्यावरील नवीन पलावा पुलाच्या उद्घाटन व कामावरून कल्याण ग्रामीणच्या आजी-माजी आमदारांमध्ये राजकीय आरोप- प्रत्यारोपाच्या फैरी झडू लागल्या आहेत. काम झाले नसताना आमदारांनी घाईघाईने पुलाचे उद्घाटन का केले, दुसऱ्या पुलाची अलाइनमेंट का बदलली, असा सवाल माजी आमदार राजू पाटील यांनी केला आहे, तर शिवसेना शिंदे गटाचे आमदार राजेश मोरे यांनी विरोधकांनी काय बोलायचे ते त्यांना बोलू द्या, आमचे काम बोलेल, असे म्हटले आहे.

कल्याण-शिळ रस्त्यावरील नवीन पलावा पुलावरून राजकारण चांगलेच तापले आहे. राजू पाटील यांनी सोमवारी ता. पलावा पुलाची पाहणी केली. या वेळी त्यांनी पुलाच्या कामात काय त्रुटी आहेत, हे दाखवून दिले. या वेळी ते म्हणाले की, पुलाचे अजूनही काम सुरू आहे, ते पूर्ण झालेले नाही. ठेकेदाराने संबंधित प्रशासनाला हा पूल अद्याप हस्तांतरित केलेला नाही. तरीदेखील स्थानिक आमदारांनी घाईघाईने हा पूल वाहतुकीसाठी सुरू केला. पुलावर काही अपघात झालेत. याप्रकरणी गुन्हे दाखल झाले पाहिजेत, तसेच एसीबीकडे यांची तक्रार केली पाहिजे, असे ते म्हणाले. या पुलाच्या गर्डर बसविण्याच्या कामाचे फटाके फोडून आनंद साजरा केला होता. मग पुलाच्या उद्घाटनप्रसंगी ते केले नसते का? भीतीपोटी त्यांनी हा पूल सुरू केला.

अत्यंत चुकीच्या पद्धतीने हे काम केल्याने या ठिकाणी लोकांचे बळी जाऊ शकतात. त्यांनी लवकरात लवकर या पुलाची डागडुजी करावी, अशी आमची मागणी असल्याचे मनसेचे नेते राजू पाटील यांनी सांगितले. तसेच दुसऱ्या अर्धवट पुलाची पाहणी करत ते म्हणाले, या पुलाची अलाइनमेंट बदलली आहे, ती कशासाठी हा सवालदेखील उपस्थित केला आहे. शिवसेना ठाकरे गटाने पुलावरील अपघातप्रकरणी संबंधितांवर गुन्हे दाखल करण्याची मागणी केली आहे. याविषयी पाटील म्हणाले की, पोलिसांकडे तक्रार करण्याऐवजी एबीसीकडे तक्रार करायला हवी. याच्यात मोठ्या प्रमाणात भ्रष्टाचार झाला आहे. ठेकेदारीची चाैकशी करावी, तेव्हा या पुलाच्या कामातील काळंबेरं बाहेर येईल.

‘आम्ही कामातून बोलतो’
विरोधकांच्या टीकेला उत्तर देताना कल्याण ग्रामीणचे शिवसेना शिंदे गटाचे आमदार राजेश मोरे म्हणाले की, विरोधकांनी काय बोलायचे ते त्यांनी ठरवावे. पत्री पूल, माणकोली पुलाच्या नावानेदेखील आमच्यावर खापर फोडले गेले; मात्र विकासाच्या मुद्यावर आम्ही पुढे जाणार आहोत. आम्ही काम करतो व आमचे काम बोलेल. लोकांना आम्ही काय देऊ शकतो, यावर आमचे लक्ष आहे, असे ते म्हणाले.