बदलापुरातील वीज समस्या थेट मंत्रालयात

बदलापूर, ता. ८ (बातमीदार) : सततचा खंडित होणारा वीजपुरवठा यामुळे बदलापूरकर पुरते हैराण झाले आहेत. दिवसभरात अर्धा तास का होईना घरातील वीज गायब असते. पावसाळ्यात तर संपूर्ण दिवसभर वीज नसते. यासाठी बदलापुरात आंदोलने झाली आणि मोर्चेही निघाले. एवढे होऊनही यावर तोडगा निघत नसल्याने, अखेर राष्ट्रवादी अजित पवार गटाचे प्रदेश सरचिटणीस आशीष दामले यांनी आता बदलापूरच्या विजेची समस्या थेट ऊर्जा मंत्रालयातच मांडली आहे. यावर बदलापूरकरांच्या आशा पल्लवीत झाल्या आहेत.

बदलापूर शहरात विजेची समस्या ही आत्तापर्यंतची सगळ्यात मोठी बनली आहे. ज्या तुलनेत शहरातील लोकवस्ती वाढत आहे त्याच्या निम्म्या प्रमाणातही पुरवठा नाही. वारंवार वीजपुरवठा खंडित होण्याच्या तक्रारी रोजच्या झाल्या आहेत. याचा परिणाम दैनंदिन कामकाजावर होत आहे. वीज नसल्याने पाणी समस्येला आपसूकच तोंड द्यावे लागत आहे. या मूलभूत सुविधांच्या समस्येबाबत शहरात तीव्र संतापाची लाट उसळली आहे. याचाच परिणाम म्हणून महावितरण आणि महाराष्ट्र जीवन प्राधिकरण कार्यालयावर बदलापूरकरांनी राजकीय पक्षाच्या पुढाकारातून जन आंदोलने केली. महाविकास आघाडीने केलेल्या आंदोलनात तर नागरिकांनी मोठा संताप व्यक्त केला. असे असूनही मूळ समस्या मार्गी लागत नसल्याने दामले यांच्या प्रयत्नातून ही समस्या थेट ऊर्जा मंत्रालयात पोहचली आहे. ऊर्जा विभागाच्या अपर मुख्य सचिव आभा शुक्ला यांना संपर्क करून त्यांना शहरातील सततच्या वीज खंडित होण्याच्या समस्येवर उपाय सूचविण्यास विनंती केली. तसेच, शहरातील नागरिकांकडून होत असलेल्या संतापाबाबत कल्पना दिली. शुक्ला यांनी लगेच महावितरण विभागाच्या वरिष्ठ अधिकाऱ्यांना याबाबत विचारणा करून, लवकरात लवकर पर्यायी उपाययोजना काय करण्यात येईल? याबाबत निर्णय घेण्यात येईल, असे आश्वासन दिले.