धिंगाणा घातला तर याद राखा

खरड डोंगरीवर पर्यटकांना सक्त मनाई
पर्यटकांना ग्रामस्थांचा इशारा
सकाळ वृत्तसेवा
डोंबिवली, ता. ८ : ठाणे जिल्ह्यात मुसळधार पाऊस सुरू असल्याने मलंगगड भागातील नदी, ओहोळ किनारी परिसरात पर्यटकांच्या पार्ट्या सुरू झाल्या आहेत. कुशिवली, खरड, ढोके गावच्या परिसरात पर्यटक गर्दी करू लागले आहेत; मात्र पर्यटकांना नदीपात्राचा अंदाज नसल्याने अनेकदा अपघात घडतात. तसेच येणारे पर्यटक हे परिसरात धिंगाणा घालत असल्याने त्याचा गामस्थांना त्रास होत आहे. यामुळे ग्रुप ग्रामपंचायत खरडने खरड डोंगरीवर पर्यटकांना येण्यास सक्त मनाई केली आहे. तसेच पर्यटकांनी धिंगाणा घातल्यास कायदेशीर कारवाईचा इशारादेखील देण्यात आला आहे.

हिरवाईने नटलेला मलंगगड परिसर पर्यटकांना खुणावू लागला आहे. काही दिवसांपासून मुसळधार पाऊस या भागात पडत आहे. त्यामुळे नद्या दुथडी भरून वाहू लागल्या आहेत. सुट्टीच्या दिवशी शालेय, महाविद्यालयीन विद्यार्थी, तरुण मंडळी या भागात येत आहेत. यात मुंबई, नवी मुंबई, ठाणे, कळवा, मुंब्रा, कल्याण डोंबिवली, अंबरनाथ भागातील पर्यटकांचा मोठा सहभाग असतो. अतिउत्साही पर्यटक नदीपात्रात कुठेही उड्या मारतात. नदीकिनारी ओल्या पार्ट्या करतात. मद्यपान केल्यानंतर ते धिंगाणा घालतात. सर्रास असे चित्र ग्रामीण भागात दिसू लागले आहे.

अनेकदा तरुणांना नदीपात्रातील खोलीचा अंदाज न आल्याने पाण्यात बुडून अनेकांचा मृत्यू झाल्याची घटना घडल्या आहेत. स्थानिक ग्रामस्थांनी एखाद्या ठिकाणी पाण्यात उतरू नका, धोका आहे असे सूचित केले तरी पर्यटक त्यांचे न ऐकता पाण्यात उतरतात. अतिउत्साही पर्यटकांच्या धिंगाण्यामुळे ग्रुप ग्रामपंचायत खरडने पर्यटकांसाठी एक सूचना जारी करत त्याचा फलक मलंगगड भागात लावला आहे.

ग्रामपंचायत खरडअंतर्गत येणाऱ्या आंभे, डोके, कुशिवली, खरड गावातील ग्रामस्थांनी या सूचनेला संमती दर्शवली आहे. ग्रामपंचायतीच्या म्हणण्यानुसार शहरातील पर्यटक दारू पिऊन अश्लील चाळे करतात, दारूच्या बाटल्या फोडतात, लाज वाटेल असे कृत्य करत असल्याने ग्रामीण भागातील संस्कृती बिघडत आहे.

कायदेशीर कारवाईचा इशारा
डोंगरीजवळ आई गावदेवी मंदिर, महादेव मंदिर असून, ते ग्रामस्थांचे श्रद्धास्थान आहे. पर्यटकांच्या वागण्याने त्याचे पावित्र्य भंगत आहे. ग्रामपंचायत खरड क्षेत्रात असे प्रकार मोठ्या प्रमाणात आढळून येत आहेत. अशा पर्यटकांमुळे स्थानिक नागरिकांना मोठा त्रास होत आहे. म्हणून पर्यटकांना या भागात येण्यास सक्त मनाई करण्यात येत आहे. पर्यटकांनी धिंगाणा केल्यास कायदेशीर कार्यवाही करण्यात येईल, असा इशारा देण्यात आला आहे.