नवीन पलावा पूल सुरू

नवीन पलावा पूल सुरू
कल्याण-शिळ रस्त्यावर कोंडी कायम
सकाळ वृत्तसेवा
डोंबिवली, ता. ८ : कल्याण-शिळफाटा रस्त्यावरील नवीन पलावा पुलाचे काम पूर्ण झाले नसले तरी पुलावरून वाहतूक सुरूच आहे. पूल सुरू झाल्याने वाहतूक कोंडी कमी झाल्याचा दावा सत्ताधाऱ्यांनी केला आहे; मात्र पुलाच्या काटई नाका परिसरातील पोहोच रस्त्याचे रुंदीकरण झाले नसल्याने काटई नाका परिसर, कल्याण-शिळफाटा रस्त्यावरील कोंडी सकाळ-संध्याकाळ कायम आहे. सोमवारी (ता. ७) या कोंडीत एक रुग्णवाहिका अडकून पडली होती.

कल्याण-शिळफाटा रस्त्यावरील देसाई खाडी ते काटई नाका या नवीन पलावा उड्डाणपुलाचे नुकतेच उद्घाटन झाले आहे. कल्याण ग्रामीणचे आमदार राजेश मोरे यांच्या हस्ते या पुलाचे उद्घाटन करण्यात आले; मात्र पूल सुरू होऊन काही तास उलटताच पुलावर अपघात झाला. त्यामुळे पूल वाहतुकीसाठी बंद केला. यामुळे सत्ताधारी शिवसेना शिंदे गटावर सर्वच स्तरातून टिका होऊ लागली. या पुलाची मनसेचे नेते तथा कल्याण ग्रामीणचे माजी आमदार राजू पाटील यांनी सोमवारी पाहणी केली. माजी आमदार पाहणीसाठी जाणार याची कुणकुण लागताच आमदार मोरे यांनी पत्रकारांशी संवाद साधत विरोधी गटावर टीका केली. तसेच कल्याण-शिळफाटा रस्त्यावरील पलावा पूल सुरू झाल्यापासून शुक्रवारपासून पलावा भागात वाहतूक कोंडी झालेली नाही. लोकांना अतिशय मोकळा रस्ता मिळाला आहे, असे सांगितले; मात्र सोमवारी सायंकाळी कल्याण-शिळफाटा रस्त्यावर मोठ्या प्रमाणात वाहन कोंडी झाल्याचे चित्र दिसून आले. या वाहन कोंडीत रात्री आठच्या दरम्यान एक रुग्णवाहिकादेखील अडकून पडली होती. पलावा चौकात वाहनांची गर्दी कमी झाली असली तरी आता या वाहनांचा भार काटई नाक्यावर येऊ लागला आहे. यामुळे काटई नाका ते मानपाडापर्यंत वाहतूक कोंडी होत आहे.

मेट्रोचे सुरू असलेले काम, अनेक ठिकाणी रस्त्याचे न झालेले रुंदीकरण, वाहनांची वाढती संख्या, नवीन पुलाच्या काटई नाका येथील उताराच्या ठिकाणी रस्त्याचे न झालेले रुंदीकरणाचे काम यांसह इतर कारणांमुळे कोंडी होत आहे.

शेतकरी आक्रमक
भिवंडी बाह्यवळण रस्ता ते शिळफाटा दत्तमंदिर चौक (कल्याण फाटा) २१ किलोमीटर लांबीचा रस्ता रुंदीकरण करून एमएसआरडीसीने सहा पदरी केला आहे. सिमेंट काँक्रीटच्या या रस्त्यांवरून वाहने सुसाट धावतात. काटई ते निळजे, देसाई, खिडकाळी गाव हद्दीत शिळफाटा रस्त्यालगत असलेल्या शेतकऱ्यांना रस्त्याचा मोबदला देण्यात आला नाही. त्यामुळे शेतकरी शिळफाटा रस्ता रुंदीकरणासाठी जमिनी देत नाहीत. आधी बाधितांना मंजूर झालेली ३०७ कोटींची भरपाई द्या, मगच रुंदीकरणासाठी जमिनी देऊ, अशी आक्रमक भूमिका बाधित शेतकऱ्यांनी घेतली आहे.
दोन वर्षांपूर्वी सरकारने शिळफाटा बाधित शेतकऱ्यांचा मोबदला मंजूर केला आहे; मात्र त्याचे वाटप केले जात नसल्याने स्थानिक शेतकऱ्यांनी एक इंच जमीन रस्ता रुंदीकरणासाठी देणार नाही, अशी आक्रमक भूमिका घेतली आहे. काटई निळजे पूल सुरू झाल्याने पलावा चौकातील कोंडी काही प्रमाणात कमी झाली आहे, असे वाहतूक पोलिसांनी सांगितले.