आफ्रिकन नागरिकाला एमडी ड्रग्ससह अटक

आफ्रिकन नागरिकाला एमडी ड्रग्जसह अटक
कल्याण, ता. ८ (बातमीदार) : खोणी पलावा सोसायटीतून एमडी ड्रग्ज ताब्यात घेतल्याचे प्रकरण ताजे असतानाच पुन्हा एकदा डोंबिवलीतील निळजे येथून मोठ्या प्रमाणावर एमडी ड्रग्ज पोलिसांच्या हाती लागले आहे. सार्वजनिक रस्त्यावर छापा टाकून १.५१ किलो वजनी मेफेड्रोन ताब्यात घेतले असून, त्याची किंमत दोन कोटींपेक्षा जास्त आहे. याप्रकरणी मानपाडा पोलिसांनी इसा बकायोका या परदेशी नागरिकाला ताब्यात घेत पुढील तपास सुरू केला आहे. पोलिसांनी आरोपीला अटक केली असून, तो आफ्रिका खंडातील ‘आयव्हरी कोस्ट’ देशातील असल्याचे समोर आले आहे. २७ जून रोजी मानपाडा पोलिस ठाणे हद्दीत सव्वादोन कोटी रुपयांचे मेफेड्रोन (एमडी) सापडले होते. त्या अनुषंगाने नवी मुंबई परिसरात आरोपींचा शोध घेताना या परदेशी नागरिकाची माहिती मिळाल्याने पोलिसांना यशस्वी कारवाई करता आली. मानपाडा पोलिस ठाण्यात एमडी ड्रग्ज गुन्ह्यातील मुख्य आरोपी फरहान उर्फ मोहम्मद राहीब सलीम शेख याची बंगळूर येथील चोरीची गाडी एमडीसह ताब्यात घेतली आहे.