भारतीय महिला संघाला रौप्यपदक

जागतिक फायर स्टेअर रेसमध्ये महिला संघाला रौप्यपदक
अंतिम फेरीत पनवेलची शुभांगी घुले अव्वल
नवीन पनवेल, ता. ८ (बातमीदार) ः अमेरिकेतील अल्बामा येथे नुकत्याच झालेल्या २१ व्या जागतिक पोलिस व अग्निशमन स्पर्धेत भारताच्या महिला संघाने देदीप्यमान कामगिरी केली. रविवारी (ता. ६) स्टेअर रेस फुल गिअर या स्पर्धेचा अंतिम सामना झाला. त्यात भारताच्या महिला संघाला रौप्यपदक मिळाले आहे. या संघात पनवेल अग्निशामक दलाच्या शुभांगी घुले यांचाही समावेश असल्याने सर्वत्र अभिमानास्पद प्रतिक्रिया उमटत आहेत.
याच स्पर्धेत गेल्या आठवड्यात अल्टिमेट फायर फायटिंग चॅलेंज प्रकारात पनवेल अग्निशामक दलाच्या शुभांगी घुले यांनी कांस्यपदक पटकावले होते. आता याच स्पर्धेच्या अंतिम फेरीत सांघिक गटात त्यांच्या संघाने रौप्यपदक पटकावले आहे. फायर फायटिंग चॅलेंज स्पर्धेत चौथे, तर फायर स्टेअर रेस वैयक्तिक स्पर्धेत पाचवे स्थान पटकावले आहे. या स्पर्धेत ५० पेक्षा अधिक देशांचे खेळाडू सहभागी झाले होते. त्यात भारतीय संघात शुभांगीचा विशेष सहभाग असल्याने तिचा अभिमान वाटतो, अशी प्रतिक्रिया महापालिका आयुक्त मंगेश चितळे यांनी दिली. तिच्या यशाबद्दल अतिरिक्त आयुक्त गणेश शेठे, परिवहन व्यवस्थापक कैलास गावडे, अग्निशामक अधिकारी हरिदास सूर्यवंशी यांनी कौतुक केले.

भारतीय अग्निकन्यांचा संघ
या स्पर्धेत अग्निशामक दलाच्या भारतातील विविध भागातील पाच महिला सहभागी झाल्या होत्या. त्यात तीन उत्तरराखंड, एक मुंबई आणि एक पनवेलच्या होत्या. रौप्यपदक विजेत्या भारतीय महिलांच्या संघात शुभांगी घुले, डिंपल रावत, माधुरी भंडारी, श्वेता दवणे, पिंकी रावत यांचा समावेश आहे.

फोटो ओळीः जागतिक फायर स्टेअर रेस स्पर्धेत रौप्यपदक मिळवलेला भारतीय महिला संघ.