विद्यार्थ्यांच्या सर्वांगीण विकासासाठी कार्यक्रम

बोर्डी (बातमीदार) : आचार्य भिसे गुरुजी यांच्या पुण्यतिथीचे औचित्य साधून वन रावण काकूबाई लाखाणी विद्यालयात नुकतेच विविध उपक्रमांचे आयोजन करण्यात आले होते. या सप्ताहामध्ये विद्यार्थ्यांच्या सर्वांगीण विकासासाठी शैक्षणिक, सामाजिक व पर्यावरणपूरक कार्यक्रम राबवण्यात आले. पाचवी ते सातवीच्या वर्गातील विद्यार्थ्यांसाठी चित्रकला स्पर्धेचे आयोजन करण्यात आले. त्याचप्रमाणे, शाळेजवळील रस्त्याच्या दुतर्फा एकूण ५० झाडांचे वृक्षारोपण करण्यात आले. विद्यार्थ्यांना शेतीची आवड निर्माण व्हावी, म्हणून आंबा कलम करण्याच्या प्रक्रियेची माहिती देण्यात आली आणि प्रत्यक्ष प्रात्यक्षिक करून दाखवण्यात आले. या कामी डहाणूतील जामशेत येथील भीमजी निमला यांचे मार्गदर्शन लाभले. सातवीच्या विद्यार्थ्यांना पारंपरिक आदिवासी चित्रकलेविषयी माहिती देण्यात आली आणि प्रत्यक्ष चित्रे काढण्याचे प्रशिक्षण शाळेचे माजी विद्यार्थी विनेश धोडी यांनी दिले. शाळेजवळील वेवजी परिसरामध्ये रस्ते स्वच्छ करण्याचा उपक्रम राबवण्यात आला. यासाठी घोलवड पोलिस ठाण्याचे अधिकारी साहेबराव कचरे, पोलिस कर्मचाऱ्यांचे सहकार्य लाभले. विद्यार्थ्यांना दारू आणि अमली पदार्थांचे दुष्परिणाम समजावून सांगणारे मार्गदर्शन सत्र घेण्यात आले.