निंबवली उपकेंद्रासाठी रुग्णवाहिकेची मागणी

वाडा, ता. १० (बातमीदार) : निंबवली आरोग्य उपकेंद्राचा भाग हा आदिवासी लोकवस्तीचा आहे. येथील वाड्या वस्त्यांवर रस्ते, वीज, पाणी या मूलभूत गरजाही उपलब्ध नाहीत. या परिसरात रात्री बेरात्री कुणी आजारी पडला, तर त्याला डोली करून काही अंतरावर रस्त्यावर आणावे लागते. जे मिळेल त्या सुविधेने कसेबसे हे रुग्ण उपकेंद्र गाठतात; परंतु गंभीर स्वरूपाचा रुग्ण असेल, तर या आरोग्य उपकेंद्रात रुग्णवाहिकाच उपलब्ध नसल्याने या रुग्णांना पदरमोड करून वेळप्रसंगी उसनवारी करून मिळेल, त्या खासगी वाहनाने पुढील उपचारासाठी धाव घ्यावी लागते. या उपकेंद्रात त्वरित रुग्णवाहिकेची उपलब्धता करून रुग्णांना दिलासा द्यावा, अशी मागणी शिवसेनेच्या उद्धव ठाकरे गटाचे तालुका सचिव सागर पाटील यांनी जिल्हा आरोग्य प्रशासनाकडे केली आहे.

निंबवली आरोग्य उपकेंद्रावर या परिसरातील दहा ते बारा हजार लोकवस्ती असलेले आदिवासींचे गाव-पाडे अवलंबून आहेत. तालुक्यात सध्या मुसळधार पाऊस कोसळत असल्याने येथे सर्पदंश, विंचू हे रुग्ण उपचारासाठी येत असतात. त्यातील काही रुग्ण गंभीर झाल्यास पुढे उपचारासाठी नेण्यास उपकेंद्रात रुग्णवाहिकाच नसल्यामुळे वेळेत पोहोचता येत नाही. त्यामुळे नाहक काही ना जीव गमवावा लागतो. अशा घटना येथे वारंवार घडत आहेत, ही बाब प्रशासनाने गांभीर्याने घेऊन या उपकेंद्रात तत्काळ रुग्णवाहिकेची व्यवस्था करावी, अन्यथा तीव्र आंदोलन छेडू, असा इशारा पाटील यांनी दिला आहे.