जिल्हाधिकारी कार्यालयावर आज मोर्चा

पालघर, ता. ८ (बातमीदार) : केंद्र सरकारच्या प्रस्तावित कामगार कायद्याविरोधात भारतीय मजदूर संघ वगळता सर्व संघटनांनी उद्या (ता. ९) देशव्यापी बंदचे आवाहन केले आहे. या बंदबाबत केलेल्या मागण्यात इपीएस ९५ पेन्शनधारकांच्या पेन्शनवाढीचाही मुद्दा अंतर्भूत केल्यामुळे देशभरात पेन्शनधारक जिल्हाधिकारी कार्यालयावर मोर्चाद्वारे निवेदन देऊन पाठिंबा दर्शविणार आहेत.

गेली ११ वर्षे पेन्शनवाढीचे वारंवार आश्वासन देऊनही केंद्र सरकारने एक रुपयाचीही वाढ केली नाही. एक हजार ते साडेतीन हजार या अल्प उत्पन्नात जगणे असह्य झाल्याची खंत ७६ लाख पेन्शनधारकांच्या मनात आहे. सरकारच्या असंवेदनशीलतेच्या विरोधात निर्माण झालेल्या राग व दुःखाचा भडका आगामी काळात उडू शकतो, याची दखल सरकारने घ्यावी, असे आवाहन जिल्हाध्यक्ष अनिल ताहाराबादकर यांनी मोर्चाबाबत माहिती देताना केले.