मान्यताप्राप्त शिक्षकांना शासकीय वेतन द्यावे!

बोर्डी, ता. ९ (बातमीदार) : ग्रामीण भागात संस्था चालवणे अवघड झाले आहे. अनेक विनाअनुदानित शिक्षकांना अल्पवेतन देऊन विद्यार्थ्यांना शिक्षण देण्याची वेळ संस्थांवर आली असून सरकारने याबाबतीत गांभीर्याने लक्ष घालून मान्यताप्राप्त शिक्षकांना शासकीय वेतन सुरू करावे, असे आवाहन आचार्य भिसे शिक्षण संस्थेचे संस्थापक सदस्य एन. के. पाटील यांनी केले. आचार्य भिसे गुरुजी यांची पुण्यतिथी व आचार्य भिसे शिक्षण संस्थेच्या वर्धापनदिनानिमित्त आयोजित केलेल्या कार्यक्रमात ते बोलत होते. याप्रसंगी संस्थेचे अध्यक्ष विजय म्हात्रे, उपाध्यक्षा ऊर्मिला करमरकर, श्रीकांत सावे, मुख्याध्यापिका पौर्णिमा राऊत, संस्थेचे विश्वस्त व ग्रामस्थ मोठ्या संख्येने उपस्थित होते.

गेल्या ४३ वर्षांत या संस्थेने ग्रामीण भागात साक्षरतेचे काम मोठ्या उदारतेने केले आहे. अनेक लोकांच्या देणग्यांमधून संस्था, शाळा, महाविद्यालय, औद्योगिक प्रशिक्षण केंद्र चालवत आहे; परंतु सरकारच्या शैक्षणिक धोरणांमध्ये असलेल्या त्रुटीमुळे काही शिक्षकांना शासकीय वेतन मिळत नसल्यामुळे संस्थेला आर्थिक ताण पडत आहे. अशा परिस्थितीत शिक्षणाच्या कार्यामध्ये अडथळा येऊ नये व गोरगरीब आदिवासी समाजाला शिक्षणाच्या प्रवाहात आणण्यासाठी उत्साह वाढविण्याकरिता सरकारने त्वरित निर्णय घेऊन शिक्षकांना शासकीय वेतन मिळेल, अशी तरतूद करावी, अशी मागणी पाटील यांनी केली आहे.