बालसंगोपन केंद्रात अप्रमाणित औषधांचा पुरवठा

विरार, ता. १० (बातमीदार) : सातिवली येथील बालसंगोपन केंद्रात अप्रमाणित औषधांचा पुरवठा करणाऱ्या व्यक्ती, तसेच या प्रक्रियेत सहभागी असलेल्या पालिका अधिकाऱ्यांविरोधात कारवाई करण्यात यावी, अशी मागणी माजी सभापती तथा शिवसेनेच्या बाळासाहेब ठाकरे गटाचे तालुकाप्रमुख सुदेश चौधरी यांनी केली. या मागणीसंदर्भात चौधरी यांच्या नेतृत्वात शिवसेना शिष्टमंडळाने महापालिका अतिरिक्त आयुक्त संजय हेरवाडे यांची भेट घेत निवेदन दिले.

अन्न व औषध प्रशासनाच्या अधिकाऱ्यांनी महापालिकेच्या सातिवली येथील माता बाल संगोपन केंद्रातील औषधांची नमुने तपासणी केली असता त्यात बनावट औषध गोळ्यांचा पुरवठा होत असल्याचे समोर आले होते. याप्रकरणी वालीव पोलिस ठाण्यात पुरवठादाराविरोधात गुन्हा दाखल करण्यात आला होता. या प्रकरणात पालिकेतील डॉक्टर, तसेच अधिकारीदेखील सहभागी असू शकतात. औषध पुरवठादार, तसेच इतरांनी संगनमताने बनावट औषध खरेदी-विक्री केलेली आहे, अशी साशंकता चौधरी यांनी निवेदनातून व्यक्त केली आहे. या शिष्टमंडळात शहरप्रमुख उमेश गोवेकर, उपतालुका संघटक अर्पिता पडवळ, शहरसचिव रोशन चोरगे, उपशहरप्रमुख चंद्रशेखर साटम, उपशहर संघटक मंगला मोंडे, असलम पठाण, योगेश कदम, खुशी सोनी, विशाल साळुंखे आणि बाळकृष्ण धोपटे आदींचा समावेश होता.