वसई तालुका क्रीडा संकुल समितीची बैठक

विरार (बातमीदार) : राज्य सरकारच्या शालेय शिक्षण व क्रीडा विभागअंतर्गत वसई तालुका क्रीडा संकुल समितीची बैठक आमदार तथा तालुका क्रीडा संकुल समितीच्या अध्यक्षा स्नेहा दुबे-पंडित यांच्या अध्यक्षतेखाली वसई पश्चिम येथील आमदार जनसंपर्क कार्यालयात पार पडली. या बैठकीमध्ये तालुका क्रीडा समितीची पुनर्रचना, तालुक्यातील क्रीडा संकुलासाठी योग्य जागा प्राप्त करण्यासंदर्भातील चर्चा, क्रीडा संकुलासाठी प्रत्यक्ष जागेची पाहणी या विषयाचा समावेश होता. आमदारांनी समितीच्या सदस्यांसह जागेवर जाऊन स्थळपाहणी केली. या बैठकीला जिल्हा क्रीडा अधिकारी सुहास व्हनमाने, वसई पंचायत गटविकास अधिकारी प्रदीप डोलारे, वसई निवासी नायब तहसीलदार राजाराम देवकाते, केंद्रप्रमुख राजेंद्र उबाळे, वसई ग्रामीण क्रीडा केंद्रप्रमुख संजय किणी, महापालिकेचे क्रीडाप्रमुख योगेश चौधरी, क्रीडा तांत्रिक सदस्य गौरव राऊत, क्रीडा तांत्रिक प्रमुख जयेश वैती, क्रीडा सल्लागार गोविंद शिंदे आदी उपस्थित होते.