नेवाळी नाका रस्त्यावर कचरा

नेवाळी नाका रस्त्यावर कचरा
कल्याण, ता. ८ (बातमीदार) : श्री मलंगगड ते चक्कीनाका रोड नेवाळी नाका येथील रस्त्यावर कचऱ्याने अतिक्रमण केल्याचे चित्र वारंवार पाहायला मिळत आहे. चक्कीनाक्याकडे येणाऱ्या मार्गावर डाव्या बाजूला कचऱ्याचे मोठे साम्राज्य पसरत आहे. त्यामुळे निम्मा रस्ता कचऱ्याने व्यापून जात आहे. यामुळे चालकांना त्रास सहन करावा लागत आहे.
नेवाळी नाक्याच्या अलीकडे काहीच अंतरावर कल्याण-डोंबिवली महापालिकेची हद्द समाप्त होऊन नेवाळी ग्रामपंचायत सुरू होते. याच रस्त्यावर परिसरातील नागरिक तसेच व्यापाऱ्यांनी मोठ्या प्रमाणावर कचरा केलेला आहे. फळे, खराब झालेल्या भाज्या, प्लॅस्टिकच्या पिशव्या अशा प्रकारचा कचरा गोण्या भरून रस्त्यावरच आणून टाकला जातो. अनेक दिवस पावसात कुजलेल्या या कचऱ्यामुळे परिसरात दुर्गंधी पसरली आहे. नेवाळीनाका ते चक्कीनाका मार्गावर श्री मलंगगड, अंबरनाथ तसेच नवी मुंबईकडून आलेली वाहने ही कल्याणच्या दिशेने मार्गस्थ होत असतात. त्यामुळे या रस्त्यावरून जाताना वाहनांच्या काचा बंद करून प्रवास करावा लागतो, तर दुचाकीस्वारांनाही नाक बंद करून जाण्याची वेळ आली आहे.