पावणेदोन लाखांचे सोन्याचे दागिने लंपास

ठाणे, ता. ८ : एक वर्षापासून दिवा, साबेगाव येथे वास्तव्यास असलेल्या नीलेश जोईल यांच्या घराचे कुलूप तोडून चोरट्याने घरातील सुमारे पावणेदोन लाख रुपयांचे सोन्याचे दागिने घेऊन पोबारा केला आहे. याप्रकरणी मुंब्रा पोलिस ठाण्यात गुन्हा दाखल करण्यात आला आहे. तक्रारदार हे मुंबईतील एका हॉटेलमध्ये काम करत असून, त्यांची पत्नी कल्याण येथील एका मॉलमध्ये कामाला आहे. दोघे मुलीला शाळेत सोडून कामाला गेले होते. याचदरम्यान त्यांच्या घराचे कुलूप तोडून चोरी करण्यात आली. त्यांची पत्नी कामावरून रात्री घरी आल्यावर घराच्या दरवाजाला कुलूप नसल्याचे निदर्शनात आले. घरामधील लोखंडी कपाटाचे लॉक तोडून कपाटात ठेवलेले सोन्याचे दागिने, रोख रक्कम चोरीला गेल्याचे समोर आले. चोरट्यांनी सोन्याचे मंगळसूत्र, सोन्याचे ब्रेसलेट, अंगठ्या, रिंग, कानातील टॉप, पट्ट्याची साखळी असा एक लाख ६८ हजार ५०० रुपये किमतीचे सोन्याचे दागिने चोरीला गेल्याचे तक्रारी नमूद केले आहे. याप्रकरणी मुंब्रा पोलिस पुढील तपास करत आहेत.