जुईनगर रेल्वे स्थानक नाल्यालगत डेब्रिजचा ढिग

जुईनगर रेल्वेस्थानक नाल्यालगत डेब्रिजचा ढीग
जुईनगर, ता. ८ (बातमीदार) : जुईनगर रेल्वेस्थानकाजवळील नाल्यालगत मोठ्या प्रमाणात डेब्रिज टाकण्यात येत आहे. त्‍याचा त्रास स्‍थानक परिसरात ये-जा करणाऱ्या प्रवाशांना होत आहे.
जुईनगर रेल्वेस्थानकाला वळसा घालून पूर्वेकडून पश्चिमेकडे हा नाला वाहतो. ठाणे- बेलापूर महामार्गाला लागून असलेल्या उपरस्त्याजवळ नाल्याच्या तोंडावर हे डेब्रिज टाकले जात आहे. जुईनगर रेल्वेस्थानकातून बाहेर पडल्यावर तुर्भे उड्डाणपुलाच्या दिशेने जाणाऱ्या रस्त्याचा आधार घेत या ठिकाणी दुरुस्ती कामातून निघालेला राडारोडा फेकलेला दिसून येत आहे. रात्रीच्या अंधाराचा फायदा घेत हे डेब्रिज टाकण्यात येत असल्याचे सांगण्यात येत आहे, तर काही अनधिकृत गाड्यादेखील कचरा आणून टाकत असल्याचे बोलले जात आहे. विनापरवाना डेब्रिज वाहतूक बेकायदेशीर आहे. पालिकेने नेमून दिलेल्या जागेवर डेब्रिज टाकणे बंधनकारक आहे. नियमबाह्य डेब्रिज वाहतूक करणे अथवा डेब्रिज टाकणाऱ्या लोकांना नोटीस बजावून कठोर कारवाई करण्यात येते, मात्र या डेब्रिज टाकणाऱ्यांकडे पालिका दुर्लक्ष करत असल्याने नाराजी व्‍यक्‍त केली जात आहे.