शेवाळमुळे पदपथ झाले निसरडे

शेवाळमुळे पदपथ झाले निसरडे
तुर्भे, ता. ८ (बातमीदार) ः पावसामुळे एकीकडे रस्त्यांची दुरवस्था झाली असताना दुसरीकडे सर्वत्र खड्डे दिसून येत आहेत. त्‍यातच आता शहरातील अंतर्गत पदपथ पावसामुळे निसरडे झाले आहेत. येथील अनेक पदपथावर सध्या शेवाळ साचल्याने पादचाऱ्याचा पाय घसरून अपघात होत आहे. विशेष म्‍हणजे सर्वाधिक धोका ज्‍येष्ठ नागरिकांना असल्याचे बोलले जात आहे. त्‍यामुळे महापालिकेने येथील रस्‍त्यावर ब्लिचिंग पावडर टाकावे, अशी मागणी नागरिकांकडून करण्यात येत आहे.
नेरूळ, सानपाडा, सीवूड्स, वाशी, कोपरखैरणे, ऐरोली येथील अनेक ठिकाणी पदपथ उखडले आहेत, तर ज्या ठिकाणी पदपथ व्यवस्थित आहेत, त्या ठिकाणी त्यांची सफाई वेळेवर होत नसल्याने तिथे हिरवळ येऊन पदपथ निसरडे झाले आहेत. त्यामुळे अनेक जण या पदपथावरून चालताना घसरून पडत आहेत. त्यात शाळेच्या बाहेरील पदपथदेखील निसरडे झाल्याने विद्यार्थ्यांसह ज्येष्ठ नागरिकांना धोका निर्माण झाला आहे. साधारण तीन वर्षांपूर्वी नेरूळमधील महिला चालण्यासाठी बाहेर पडली असताना, पदपथावरून पाय घसरून पडल्याने त्यांना दुखापत झाली. या अपघातात त्यांचा हात फॅक्चर झाल्याची घटना घडली होती. नवी मुुंबईतील बाजारपेठ, दुकाने, नागरी वस्तीमधील पदपथांवर मोठ्या प्रमाणत शेवाळ साचले आहे. त्‍यामुळे येथील रस्‍त्यावर ब्लिचिंग पावडर टाकण्यात यावी, अशी मागणी नागरिकांकडून करण्यात येत आहे, तर नवी मुंबई पालिका कार्यक्षेत्रात पावसामुळे पदपथावर निर्माण झालेल्या शेवाळवर ब्लिचिंग पावडर टाकण्याचे काम सुरू आहे. त्यानंतर जेटिंग मशीनच्याद्वारे पदपथ पूर्ववत केले जाईल, असे घनकचरा व्‍यवस्‍थापन उपायुक्‍त डॉ. अजय गडदे यांनी सांगितले.