कल्याण-डोंबिवलीत शुक्रवारी आरोग्यसेवा बंद

कल्याण-डोंबिवलीत शुक्रवारी आरोग्यसेवा बंद
अधिसूचनेविरोधात आयएमए कल्याण आक्रमक
सकाळ वृत्तसेवा
डोंबिवली, ता. ८ : महाराष्ट्र वैद्यकीय परिषदेने सीसीएमपी कोर्स पूर्ण केलेल्या होमिओपॅथी डॉक्टरांना नोंदणीची परवानगी देण्याच्या निर्णयाविरोधात इंडियन मेडिकल असोसिएशन आक्रमक झाली आहे. त्याचाच एक भाग म्हणून कल्याण आयएमएकडून हा निर्णय रद्द करण्यासाठी कल्याण तहसीलदार कार्यालयाला मंगळवारी (ता. ८) निवेदन देण्यात आले. तसेच येत्या शुक्रवारी (ता. ११) २४ तास आरोग्यसेवा बंद ठेवण्यासह १९ जुलैला मुंबईत रॅलीही काढली जाणार आहे, असे आयएमएने स्पष्ट केले आहे.

महाराष्ट्र वैद्यकीय परिषदेने ३० जून रोजी जारी केलेल्या वादग्रस्त अधिसूचनेचा आयएमइ महाराष्ट्रने तीव्र शब्दात निषेध नोंदवला आहे. या अधिसूचनेनुसार, केवळ एका वर्षाचा मॉडर्न फार्मसीचा सर्टिफिकेट कोर्स पूर्ण केलेल्या होमिओपॅथिक डॉक्टरांना महाराष्ट्र मेडिकल कौन्सिलमध्ये नोंदणीची परवानगी दिली आहे. आयएमएच्या मते हा निर्णय संपूर्ण आधुनिक वैद्यकीय शिक्षणव्यवस्थेचा आणि नैतिकतेचा अवमान करणारा आहे, त्याद्वारे रुग्णांच्या आरोग्याला गंभीर धोका निर्माण होऊ शकतो, असे डॉ. सुरेखा ईटकर यांनी सांगितले.

राज्यभर आंदोलन
त्यासाठी संपूर्ण राज्यभरातील तहसीलदारांना आयएमएच्या संबंधित शाखांकडून निवेदन देण्यात आले. या निर्णयाविरोधात तत्काळ कार्यवाहीची मागणी केली आहे. तसेच येत्या शुक्रवारी १२४ तासांची एकदिवसीय आरोग्यसेवा बंद ठेवण्यात येणार असून, २९ जुलैला मुंबईमध्ये भव्य रॅली काढली जाणार आहे, तर राज्य शासनाने ही अधिसूचना तत्काळ मागे न घेतल्यास लोकशाही मार्गाने संपूर्ण राज्यभर आंदोलनाचा इशाराही दिला आहे. कल्याण आयएमए अध्यक्ष डॉ. सुरेखा ईटकर, नियोजित अध्यक्ष डॉ. राजेंद्र लावणकर, डॉ. अश्विन कक्कर, डॉ. विकास सुरंजे, डॉ. स्नेहलता कुरीस, डॉ. स्मिता महाजन, डॉ. राजन माने, डॉ. विद्या ठाकूर आदींच्या शिष्टमंडळाचा त्यात समावेश होता.