मोलकरणीला लुटणाऱ्या चोरट्याला अटक

कळवा, ता. ८ (बातमीदार) : ठाण्यातील रुस्तम टॉवरमधून पगाराचे १२ हजार रुपये घेऊन घरी परतणाऱ्या कळव्यातील एका मोलकरणीला लुटणाऱ्या सराईत गुन्हेगाराला कळवा पोलिसांनी सोमवारी (ता. ७) अटक केली.
कळवा पूर्वेला राहणाऱ्या विजया राठोड या ठाण्यातील रुस्तम टॉवर आणि कळव्यात काही ठिकाणी मोलकरणीचे काम करते. रुस्तमजी टॉवरमधून तिला सोमवारी १२ हजार रुपये पगार मिळाला होता. कळव्यात मनीषानगरमधील शारदा अपार्टमेंट इमारतीजवळ येत असताना तिच्याजवळील पगार ठेवलेली बॅग अचानक एका अनोळखी तरुणाने हिसकावून पळ काढला. या घटनेनंतर तिने तत्काळ कळवा पोलिस ठाणे गाठले. पोलिसांनी सीसीटीव्हीच्या तांत्रिक माहितीच्या आधारे संशयित आरोपी हरी मानसिंग ठाकूर (वय ३०) याला ताब्यात घेतले. त्याने चोरी केल्याची कबुली दिली. त्याच्यावर या आधी नौपाडा, ठाणे नगर, वागळे इस्टेट, मुलुंड व कळवा या ठिकाणी सोनसाखळी चोरीचे आठ गुन्हे दाखल असल्याचे उघड झाले. कळवा पोलिसांनी त्याला अटक केली असून, घरकाम करणाऱ्या मोलकरणीला कळवा पोलिसांच्या सतर्कतेमुळे कमाईचे १२ हजार रुपये परत मिळाले. तिने कळवा पोलिसांचे आभार मानले आहेत.