१६ जुलैला ''विधानभवनावर मोर्चा

खासगीकरण रद्द न झाल्यास धडक मोर्चा
महापालिका कामगार संघटना संघर्ष समितीचा निर्णय
सकाळ वृत्तसेवा
मुंबई, ता. ८ ः घनकचरा व्यवस्थापन खात्यांतर्गत कचऱ्याचे संकलन, परिवहन आणि विल्हेवाट हे कामकाज खासगी कंपन्यांकडून करण्यासाठी काढलेली निविदा तातडीने रद्द करावी, तसेच महापालिका सफाई खात्यातील शंभर टक्के खासगीकरणाचा निर्णय मागे घेण्यात यावा, या मागणीसाठी मतदान घेऊन संपाचा निर्णय घेण्यात येईल, तसेच  बुधवारी (ता. १६) विधान भवनावर मोर्चा  काढण्यात येईल, असा इशारा पालिकेतील विविध कामगार संघटनांच्या संघर्ष समितीने घेतला आहे. 
पालिकेतील घनकचरा व्यवस्थापन खाते व परिवहन खात्यातील कायमस्वरूपी कामगारांचे काम कंत्राटदारामार्फत करण्यासाठी काढलेली निविदा मंगळवारी (ता. ८) उघडण्यात येणार होती; परंतु ती आता शुक्रवारी (ता. १८) उघडण्यात येणार आहे. त्यानंतर त्यासंदर्भात मतदान घेऊन, कामगारांचा जो निर्णय असेल, त्याप्रमाणे बुधवारी मोर्चा काढून संपाबाबतची भूमिका घेणार असल्याची माहिती संघर्ष समितीच्या वतीने निमंत्रक  वामन कविस्कर यांनी सांगितले. या वेळी विविध कामगार संघटनांचे प्रतिनिधी उपस्थित होते.