कुलाबा परिसरात मुंबईचा पहिला ‘वॉकिंग प्लाझा’

कुलाब्यात पहिला ‘वॉकिंग प्लाझा’
४० टक्के काम पूर्ण

सकाळ वृत्तसेवा
मुंबई, ता. ८ ः मुंबईकरांसाठी एक नवे पर्यटन आकर्षण आणि पादचाऱ्यांसाठी सुटसुटीत व सुरक्षित प्रवासाचे साधन ठरणारा मंबईतील पहिला ‘वॉकिंग प्लाझा’ प्रकल्प कुलाबा परिसरात आकार घेत आहे. दीपक जोग चौक (मंत्रालय) ते भाई भांडारकर चौक (बधवार पार्क) या सुमारे २१० मीटर लांबीच्या मार्गावर साकारण्यात येणाऱ्या या प्रकल्पाचे सध्या ४० टक्के काम पूर्ण झाले आहे. डिसेंबरपर्यंत याचे काम पूर्णत्वास जाण्याची अपेक्षा आहे.
‘वॉकिंग प्लाझा’मध्ये स्टॅम्प काँक्रीट तंत्रज्ञानाचा वापर करून डिझाइन केलेले आकर्षक फूटपाथ, ३डी स्ट्रीट आर्ट, सुशोभित लँडस्केपिंग तसेच नागरिकांसाठी खुला बहुउपयोगी कॉरिडॉर उभारण्यात येणार आहे. या उपक्रमासाठी पर्यटन विभाग आणि जिल्हा नियोजन व विकास समितीमार्फत एकूण पाच कोटी रुपयांचा निधी मंजूर झाला आहे. ‘कॅप्टन प्रकाश पेठे मार्गावरील वॉकिंग प्लाझा हा कुलाब्याला अधिक सुरक्षित, हरित आणि पादचाऱ्यांसाठी अनुकूल बनवण्याच्या दिशेने एक महत्त्वाचा टप्पा आहे’, असे माजी नगरसेवक मकरंद नार्वेकर यांनी सांगितले. बधवार पार्कच्या सीमाभिंतींना नवे रूप देण्याबरोबरच शोभिवंत अशोक वृक्ष आणि इतर सजावटी झाडांची लागवडही या प्रकल्पाचा भाग आहे. याशिवाय पादचाऱ्यांच्या सोयीसाठी दिशादर्शक फलकही उभारण्यात येणार आहेत. सुरक्षितता आणि सुटसुटीत शहर नियोजन याला प्राधान्यक्रम असायला हवे. या टप्प्यानंतर पालिका कुलाब्याच्या इतर भागातही अशाच स्वरूपाचे वॉकिंग प्लाझा आणि पादचारी मार्ग राबवण्याचा विचार करीत असल्याचे सांगण्यात आले.