सोनसाखळी चोर शिवाजीनगर पोलिसांच्या जाळ्यात

अंबरनाथ, ता. ८ (वार्ताहर) : नातीला सोडवायला गेलेल्या आजीच्या गळ्यातील मंगळसूत्र खेचून चोरी करणाऱ्या तीन सोनसाखळी चोरांना शिवाजीनगर पोलिसांनी बेड्या ठोकल्या. तसेच त्यांच्याकडून चोरलेले मंगळसूत्रही हस्तगत केले आहे.
अंबरनाथ पूर्वेच्या गॅस गोदामाजवळ आनंद पार्क सोसायटीमध्ये राहणाऱ्या विजया देवसन नायर या ६२ वर्षीय महिला नातीला शाळेच्या बसमध्ये बसवण्यासाठी प्रवेशद्वारावर थांबल्या होत्या. त्याच वेळी तीन दुचाकीस्वारांनी त्यांच्या गळ्यातील सव्वातीन तोळ्याचे मंगळसूत्र खेचून पोबारा झाल्याची घटना शुक्रवारी अंबरनाथमध्ये घडली होती. याप्रकरणी शिवाजीनगर पोलिसांनी गुन्हा दाखल केल्यानंतर डीबी पथकाच्या सचिन देवरे, कैलास पादीर, विकास वळवी, स्वप्नील गायकर आणि लालासाहेब राजगे यांनी तपास करत बदलापूरमधून तीन चोरट्यांना बेड्या ठोकल्या. आकाश ऊर्फ बटला सिंग, अमन यादव आणि रणजित सिंग अशी अशी तिघांची नावे आहेत. त्यांच्याकडून महिलेची चोरलेली सोनसाखळी हस्तगत केली असून, या तिघांना न्यायालयाने पोलिस कोठडी सुनावली आहे. त्यांच्यावर यापूर्वीही चोरीचे गुन्हे दाखल असल्याची माहिती उपायुक्त सचिन गोरे यांनी दिली आहे.