पीपल्स एज्युकेशन सोसायटीचा ८० वा वर्धापन थाटात साजरा

जागतिक स्पर्धेसाठी तयार राहा!
राज्यपाल सी. पी. राधाकृष्णन यांचे प्रतिपादन
सकाळ वृत्तसेवा
मुंबई, ता. ८ ः अनुसूचित जातीतील अधिकाधिक विद्यार्थ्यांनी आता गुणवत्तेवर आधारित प्रवेश तसेच नोकऱ्या मिळवण्याचा प्रयत्न करावा. आरक्षणाचा लाभ गरजू विद्यार्थ्यांना घेऊ द्यावा, तसेच विद्यार्थ्यांनी आता जागतिक स्तरावर स्पर्धेसाठी तयार राहिले पाहिजे, असे आवाहन राज्यपाल सी. पी. राधाकृष्णन यांनी आज येथे केले. पीपल्स एज्युकेशन सोसायटीच्या ८०व्या वर्धापनदिनानिमित्त आयोजित कार्यक्रमात ते बोलत होते.
अनुसूचित जातीतील अनेक विद्यार्थी आपल्या गुणवत्तेवर वैद्यकीय तसेच अभियांत्रिकी अभ्यासक्रमांना प्रवेश मिळवले आहे. आरक्षण ही विकासाची किल्ली आहे; मात्र विद्यार्थी व युवकांनी आता जागतिक स्तरावर स्पर्धेसाठी तयार राहिले पाहिजे. पीपल्स एज्युकेशन सोसायटीचे कार्यही उत्तम आहे, असे राज्यपाल म्हणाले. डॉ. बाबासाहेब आंबेडकरांनी स्थापन केलेल्या पीपल्स एज्युकेशन सोसायटीचे देशभरात काम वाढत आहे, असे संस्थेचे अध्यक्ष आणि केंद्रीय राज्यमंत्री रामदास आठवले म्हणाले. आपण पीपल्स एज्युकेशन सोसायटीच्या सिद्धार्थ महाविद्यालयाचे विद्यार्थी होतो, याचा अभिमान वाटतो. सोसायटीने आता स्वायत्त विद्यापीठ होण्याचा प्रस्ताव सादर करावा, अशी सूचना उच्च व तंत्रशिक्षणमंत्री चंद्रकांत पाटील यांनी केली. आपण संस्थेच्या परिसर विकासासाठी यापूर्वीच भरघोस निधी उपलब्ध करून दिला. सामाजिक न्याय विभागातर्फे राज्यात १२० तीन तारांकित विद्यार्थी वसतिगृहे निर्माण करण्याचा मानस असल्याचे सामाजिक न्यायमंत्री संजय शिरसाट यांनी स्पष्ट केले.
----
विविध मान्यवरांचा सत्कार
राज्यपालांच्या हस्ते संस्थेचे दोन माजी विद्यार्थी राज्याचे उच्च व तंत्रशिक्षण मंत्री चंद्रकांत पाटील तसेच सामाजिक न्यायमंत्री संजय शिरसाट यांसह विविध क्षेत्रात उल्लेखनीय कार्य करणाऱ्या २० व्यक्तींना ‘भारतरत्न डॉ. बाबासाहेब आंबेडकर पुरस्कार’ प्रदान करण्यात आले. संस्थेचे विश्वस्त ॲड. उज्ज्वल निकम यांनीदेखील या वेळी उपस्थितांना संबोधित केले. पुरस्कारार्थ्यांमध्ये ज्येष्ठ अभिनेते भाऊ कदम, अभिनेत्री क्रांती रेडकर, भदंत डॉ. राहुल बोधी, दक्षिण कोरिया येथील धम्मदीप भन्ते, उच्च शिक्षण संचालक शैलेंद्र देवळणकर, ॲड. सुरेंद्र तावडे, बळीराम गायकवाड यांचाही समावेश होता.
---------------