आंदोलनापुर्वी वसईतील मनसे नेते नजरकैदेत

आंदोलनापूर्वी वसईतील मनसे नेते नजरकैदेत
विरार, ता. ८ (बातमीदार) : मिरा-भाईंदर शहरात मराठी एकीकरण समिती व महाराष्ट्र नवनिर्माण सेनेकडून मंगळवारी काढण्यात आलेल्या मोर्चाच्या पार्श्वभूमीवर सोमवारी (ता. ७) रात्रीपासून पोलिसांनी शहरातील मनसेच्या अनेक प्रमुख नेत्यांना आणि पदाधिकाऱ्यांना ताब्यात घेतले. यामध्‍ये पोलिसांनी कलम १६३ अन्वये नोटिसाही बजावल्या, तर वसई विरारमधील काही मनसेच्या नेत्यांनाही पोलिसांनी पहाटे ३ वाजता ताब्यात घेतले. यामध्ये मनसेचे पालघर लोकसभा अध्यक्ष जयेंद्र पाटील, माजी नगरसेवक प्रफुल पाटील, वसई-विरार शहराध्यक्ष प्रवीण भोईर, पांडुरंग लोकांडे, संजय मेहरा, दिलीप नवाळे, प्रफुल्ल ठाकूर यांच्यासह कार्यकर्त्यांना वसई, विरार, नालासोपारा येथील पोलिसांनी नजरकैदेत ठेवले. दुसरीकडे शिवसेना ठाकरे गटाच्या नेत्यांना अटक केली नसली तरी त्यांना पोलिसांनी सकाळीच तुम्ही मोर्चाला जाणार का? असे विचारून त्यांच्यावर दबाव टाकण्याचा प्रयत्न केल्याचे वसई तालुकाप्रमुख प्रथमेश राऊत यांनी सांगितले.