मुलीला मारहाण करणाऱ्या आईविरोधात गुन्हा

मुलीला मारहाण करणाऱ्या आईविरोधात गुन्हा
सकाळ वृत्तसेवा
ठाणे, ता. ८ : मुंब्र्यात आई-वडिलांचे भांडण सोडविण्यासाठी गेलेल्या मुलीलाच आईने मारहाण केल्याची घटना ताजी असताना, दिव्यात अवघ्या साडेचार वर्षांच्या पोटच्या मुलीला स्टीलच्या उलथण्याने, लाथांनी आणि हाताने बेदम मारहाण केल्याची घटना पुढे आली आहे. याप्रकरणी आईविरोधात गुन्हा दाखल करण्यात आला आहे. यामध्ये चिमुरडीच्या डाव्या हाताला तसेच दोन्ही पायाला दुखापत झाली असून, मारहाणीच्या व्हिडिओवरून गुन्हा दाखल करण्यात आल्याची माहिती पोलिसांनी दिली.

यशोदा असे आरोपी आईचे नाव आहे, याप्रकरणी यशोदा हिच्या सासूने तक्रार केली आहे. त्यांचा मुलगा आणि यशोदा यांचे २०१९ मध्ये प्रेमविवाह झाला असून, त्यांना साडेचार वर्षांची मुलगी आहे. मुलीच्या जन्मानंतर यशोदा यांनी मुलीला घरी सोडून संजय नामक व्यक्तीबरोबर संसार थाटला. त्यानंतर यशोदा ही आपल्‍या मुलीला घेऊन गेली. ती संजय याच्यासोबत त्याच्या पहिल्या पत्नीच्या मुलांसबोत दिवा येथे राहात आहे. दरम्यान, रविवारी (ता. ६) सकाळी संजय याच्या एका नातेवाईक महिलेने फोन करून सांगितले की, ‘आज सकाळीच तुमच्या पत्नीने मुलीला बेदम मारहाण केली आहे. त्या बाबतचा एक व्हिडिओ पाठवला आहे. या व्हिडिओमध्ये यशोदा आपल्या मुलीला स्टीलच्या उलथण्याने, लाथांनी आणि हाताने बेदम मारहाण करून तिला आपटल्याचे दिसून आले. याप्रकरणी वैद्यकीय तपासणीत मुलीला मारहाण झाल्याचे स्पष्ट झाले. त्यानुसार यशोदा हिच्याविरोधात गुन्हा दाखल करण्यात आला असून, मुंब्रा पोलिस अधिक तपास करत आहेत.