देश चार वेळा सरेंडर झाला प्रसाद लाड यांचे वक्तव्य

देश चार वेळा सरेंडर झाला
प्रसाद लाड यांचे वक्तव्य
सकाळ वृत्तसेवा
मुंबई, ता. ८ : आपला देश आज पंतप्रधान नरेंद्र मोदी यांच्या नेतृत्वाखाली खऱ्या अर्थाने शक्तिशाली हाेताेय. हा देश शाश्वत अशी प्रगती करतो आहे. तो ‘मेक इन इंडिया’सारख्या कार्यक्रमांमधून विकसित भारत बनत आहे, पण हाच देश पूर्वीच्या नाकर्ते सरकारच्या काळात इतिहासात चार वेळा सरेंडर झाला आहे, अशी टीका भाजपचे विधान परिषदेतील मुख्य प्रतोद प्रसाद लाड यांनी परिषदेत केली.
विधान परिषदेत राज्य सरकार सरेंडर झाल्याचा आरोप विरोधकांनी केला होता. त्यावर बोलताना प्रसाद लाड म्हणाले ‘‘इथे सरेंडर होण्याचा विषय निघाला आहे, तर मला सरेंडर होण्याची इतिहासातील चार उदाहरणे द्यायची आहेत. हा देश १९४७ मध्ये लॉर्ड माऊंटबॅटन कराराच्या वेळी सरेंडर झालेला पाहिला. चीनबरोबरच्या युद्धानंतर मानसरोवर देऊन सरेंडर झाला होता. भारत पाकिस्तान युद्धानंतर हजारो बंदी सैनिक सोडले गेले, ते सरेंडर होणे होते. त्याचबरोबर पंतप्रधान इंदिरा गांधी यांच्या हत्येनंतर शिखांच्या हत्या झाल्या, ते सरेंडर होणे होते’’, असे त्यांनी या वेळी स्पष्ट केले.