वानखेडेविरोधातील चौकशी तीन महिन्यांत पूर्ण करणार

वानखेडेंविरोधातील चौकशी तीन महिन्यांत पूर्ण करू
‘कॉर्डेलिया क्रूझ’प्रकरणी सीबीआयची हमी

सकाळ वृत्तसेवा
मुंबई, ता. ८ ः कॉर्डेलिया क्रूझ लाच प्रकरणात केंद्रीय महसूल अधिकारी (डीजीटीएस) समीर वानखेडे यांच्याविरुद्धची चौकशी तीन महिन्यांत पूर्ण करू, अशी हमी केंद्रीय अन्वेषण विभागाने (सीबीआय) मंगळवारी (ता. ८) उच्च न्यायालयाला दिली.
क्रूझवरील ड्रग्ज प्रकरणासंदर्भात अभिनेता शाहरुख खानकडे २५ कोटी रुपयांची लाच मागितल्याच्या आरोपाखाली सीबीआयने दाखल केलेला गुन्हा रद्द करण्यात यावा, या मागणीसाठी वानखेडे यांनी उच्च न्यायालयात धाव घेतली आहे. त्या याचिकेवर न्या. अजय गडकरी आणि न्या. राजेश पाटील यांच्या खंडपीठापुढे सुनावणी झाली. या प्रकरणाचा तपास पूर्ण करण्यासाठी झालेल्या विलंबावर न्यायालयाने बोट ठेवले आणि तपास पूर्ण करण्यासाठी आणखी किती वर्षे लागतील? १० की २० वर्षे? अशी विचारणाही तपास यंत्रणेला केली. तेव्हा वेळ देण्याची मागणी सीबीआयच्या वतीने ॲड. कुलदीप पाटील यांनी केली. त्यांची मागणी न्यायालयाने फेटाळून लावली. तेव्हा तीन महिन्यांत तपास पूर्ण केला जाईल, अशी माहिती पाटील यांनी न्यायालयाला दिली.
...
विलंबावर आक्षेप
हा खटला जवळपास दोन वर्षांपासून प्रलंबित आहे, सीबीआय प्रत्येक वेळी सॉलिसिटर जनरल तुषार मेहता युक्तिवाद करतील, असे सांगून वेळकाढूपणा करीत आहे. प्रत्यक्षात सुनावणी होत नसल्याचा युक्तिवाद करून होणाऱ्या विलंबावर वानखेडे यांच्या वतीने ॲड. आबाद पोंडा यांनी आक्षेप नोंदवला. तसेच या प्रकरणाचा वानखेडे यांच्या कारकीर्दीवर परिणाम होत असून, त्यांची बढती रोखण्यात आली आहे. जर न्यायालयाने हे प्रकरण स्वीकारले, तर आम्ही केंद्रीय प्रशासकीय न्यायाधिकरणाकडे दाद मागू, असेही पोंडा यांनी न्यायालयाला सांगितले. त्यांचा युक्तिवाद ग्राह्य धरून न्यायालयाने वानखेडे यांची याचिका स्वीकारली आणि याआधी कठोर कारवाईपासून दिलेले अंतरिम संरक्षण कायम ठेवले.