वीज कामगार आज संपावर

वीज कामगार आज संपावर

सकाळ वृत्तसेवा
मुंबई, ता. ८ : वीज कंपन्यांमध्ये होणारा खासगीकरणाचा शिरकाव, राज्यात महावितरणच्या वीज वितरण क्षेत्रातील समांतर वीज वितरण परवाना, वीज कामगारांना पेन्शन अशा वेगवेगळ्या १४ मागण्यांसाठी उद्या बुधवार (ता. ९) वीज कामगार एक दिवसाचा संप करणार आहेत.
‘महाराष्ट्र राज्य विद्युत कर्मचारी अभियंते, अधिकारी कृती समितीच्या माध्यमातून होणाऱ्या या संपामध्ये महावितरण, महानिर्मिती आणि महापारेषण या तिन्ही कंपन्यांमधील वीज कामगार सहभागी होणार आहेत. महावितरणच्या कार्यक्षेत्रात कोणत्याही खासगी कंपनीला वीज वितरण परवाना देऊ नये, या मागणीसाठी ४ जानेवारी २०२३ रोजी वीज कामगार संघटनांनी एकत्र येऊन संप पुकारला होता. त्या पार्श्वभूमीवर कामगार संघटनांच्या नेत्यासोबत झालेल्या चर्चेवेळी तत्कालीन ऊर्जा व उपमुख्यमंत्री देवेंद्र फडणवीस यांनी तिन्ही वीज कंपन्या कोणत्याही प्रकारचे खासगीकरण करणार नाहीत, असे आश्वासन दिले होते, मात्र प्रत्यक्षात त्याविरोधात घडत आहे. त्यामुळे वीज कामगारांमध्ये नाराजी आहे. तसेच पेन्शनसह विविध मागण्यांसाठी बुधवारी मध्यरात्रीपासून वीज कामगार, अभियंते बंदमध्ये सहभागी होणार आहेत,’ असे महाराष्ट्र स्टेट इलेक्ट्रिसिटी वर्कर्स फेडरेशनचे सरचिटणीस कृष्णा भोयर यांनी सांगितले.