विकास म्हात्रे भाजपमध्ये कायम
विकास म्हात्रे भाजपमध्ये कायम
भाजपमधील वरिष्ठांनी मनधरणी करताच गैरसमज दूर
सकाळ वृत्तसेवा
डोंबिवली, ता. ८ : आमदार रवींद्र चव्हाण यांच्याकडून सहकार्य मिळत नसल्याचा आरोप करत भाजपचे माजी स्थायी समिती सभापती विकास म्हात्रे यांनी सपत्नीक पक्षातील पदाचा राजीनामा दिला होता. त्यांची नाराजी दूर होत नसल्याने ते पक्षाला सोडचिठ्ठी देतील, अशी अटकळ बांधली जात होती, मात्र भाजप जिल्हाध्यक्ष नंदू परब यांनी मध्यस्थी करत म्हात्रे व प्रदेशाध्यक्ष रवींद्र चव्हाण यांची भेट घडवून म्हात्रे यांची नाराजी दूर केली. तसेच मुख्यमंत्री देवेंद्र फडणवीस यांचीही म्हात्रे यांनी भेट घेतल्यानंतर त्यांनी भाजपमध्येच राहण्याचा निर्णय घेतला आहे.
डोंबिवली पश्चिमेतील गरिबाचापाडा येथील भाजपचे माजी स्थायी समिती सभापती विकास म्हात्रे यांनी सपत्नीक भाजप पदाधिकारी आणि सदस्यत्वपदाचा राजीनामा कल्याण जिल्हा भाजप जिल्हाध्यक्ष नंदू परब यांच्याकडे दिला होता. राष्ट्रवादीमधून भाजपमध्ये दाखल झाल्यावर म्हात्रे यांच्या घरात दोन नगरसेवकपदे आली, भाजपमधील ज्येष्ठांना डावलून कल्याण-डोंबिवली पालिकेतील मानाचे स्थायी समितीचे सभापतीपद व गटनेतेपद त्यांच्या वाट्याला आले, मात्र त्यानंतर त्यांनी थेट रवींद्र चव्हाण यांच्यावर आरोप करत राजीनामा दिल्याने भाजप कार्यकर्त्यांमध्ये नाराजीचे वातावरण पसरले. याआधीही एकदा त्यांनी पक्षातील पदाचा राजीनामा दिला होता. म्हात्रे यांना आपल्या पक्षात घेण्यासाठी शिवसेनेच्या दोन्ही गटांनी जोरदार प्रयत्न केले. विकास म्हात्रे यांनी आता भाजप सोडण्याची तयारी केल्याने तसेच म्हात्रे हे इतर पक्षातील पदाधिकाऱ्यांच्या भेटी घेत असल्याने पदाधिकाऱ्यांमध्ये नाराजी होती. याबाबत जिल्हाध्यक्ष नंदू परब यांनी यशस्वी मध्यस्थी करत सोमवारी (ता. ७) रात्री प्रदेशाध्यक्ष रवींद्र चव्हाण आणि म्हात्रे यांची भेट घडवून आणली. या वेळी म्हात्रे यांच्या प्रश्नांचे निरसन करण्यात आले. त्यांचे गैरसमज दूर करण्यात आले. या भेटीनंतर समाधान झाल्याने म्हात्रे यांनी भाजपमध्येच राहण्याचा निर्णय घेतला. म्हात्रे यांनी मुख्यमंत्री देवेंद्र फडणवीस यांचीही भेट घेतली.
विकास म्हात्रे यांचा पक्षातील वरिष्ठांच्या भेटीतून गैरसमज दूर करण्यात आला आहे. त्यांचा विकासकामांचा निधी प्रस्तावित आहे, तो त्यांना मिळणार आहे. ते आता यापुढे भाजपमध्येच निष्ठेने काम करतील.
- नंदू परब, जिल्हाध्यक्ष, कल्याण जिल्हा
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.