रायगड

वीजवितरणच्या उपअभियंत्‍याला लाच घेताना अटक
पेण, ता. ९ (वार्ताहर) : महावितरणच्या पेण मंडळ कार्यालयातील उपकार्यकारी अभियंता संजय जाधव यांनी खांब बदलण्यासाठी २५ हजार रुपयांची लाच मागणी केली होती. तडजोडीअंती पाच हजार रुपये घेताना नवी मुंबईतील लाचलुचपत प्रतिबंध विभागाने त्यांना अटक केली आहे. तक्रारदाराला विजेचा खांब अन्यत्र हलवायचा होता. यासाठी पेण महावितरणच्या अधीक्षक कार्यालयातील उपकार्यकारी अभियंता संजय जाधव यांनी २५ हजार रुपयांची लाचेची मागणी केली होती. तडजोडीअंती ती रक्कम १५ हजार करण्यात आली. मंगळवारी (ता. ८) यापैकी पेण महावितरण कार्यालयातच पाच हजार रुपये घेताना उपकार्यकारी अभियंता संजय जाधव यांना अटक करण्यात आली.

--------------

भंगार चोरीप्रकरणी टोळीला अटक
खालापूर पोलिसांची कारवाई; २४ टन माल हस्‍तगत
खालापूर, ता. ९ (बातमीदार) ः तालुक्यातील वावोशी गावाजवळ होराळे येथे नेमको कारखान्यात वजनकाट्यात फेरफार करून सुमारे आठ लाख ९२ हजार २४० रुपये किमतीचे सुमारे २३ हजार ४८० किलोग्रॅम वजनाचे भंगार (स्क्रॅप) चोरी केल्‍याप्रकरणी खालापूर पोलिसांनी मोहित भक्त बहादूर मोर, गौरवकुमार नरेशभाई मानवाला, संजय कालिदास पटनी आणि प्रकाश रमेश भाई पटणी (सर्व राहणार अहमदाबाद) यांना अटक केली. टोळीकडून सर्व माल हस्तगत करण्यात आला आहे.
नेमको कारखान्यात वजनकाट्यावर काम करणारा मोहित बहादूर मोर आणि अहमदाबाद येथील द्रष्टी एंटरप्रायझेसचे गौरवकुमार व संजय पटणी यांनी आपापसात संगनमत करून वजनकाट्यात फेरफार केला होता. हा प्रकार कारखाना व्यवस्थापनाच्या लक्षात आल्यानंतर सर्व आरोपींविरोधात तक्रार नोंदवण्यात आली. गुन्ह्याचा तपास करण्यासाठी उपविभागीय पोलिस अधिकारी विक्रम कदम, निरीक्षक सचिन पवार यांच्या मार्गदर्शनाखालील पथक अहमदाबाद येथे गेले होते. येथील आरोपींना अटक करण्यात आली असून अपहार केलेला भंगार माल दहिसर-ठाणे येथून हस्तगत केला आहे.

--------------------