नऊ क्रमांक शाळेसमोरील दगडाचा ढिगारा दूर

अंबरनाथ, ता. ९ (बातमीदार) : अंबरनाथ नगरपालिकेच्या शिवमंदिर परिसरातील नऊ क्रमांक शाळेतील दुरवस्थेचे सचित्र वृत्त प्रसिद्ध झाले. याची दखल नगरपालिका प्रशासन आणि शिक्षण प्रशासनाधिकारी घेतली असून शाळेतील गैरसोयी दूर करण्यासाठी युद्धपातळीवर हालचाली सुरू केल्या. पालिकेच्या नऊ क्रमांक शाळेसमोरील दगडांचा ढिगारा हटवण्यात आला आहे. तसेच, स्वच्छतागृहाचे तुटलेले दरवाजे बसले. वर्गातून वाहणाऱ्या पाण्याला वाट काढून देण्यात आली, यामुळे नगरपालिका शाळा क्रमांक ९ मधील विद्यार्थ्यांसह शिक्षकांना दिलासा मिळाला आहे.
जून महिन्यात शाळा सुरू झाल्या, तरी शाळेसमोरील दगड-मातीचा ढिगारा हटवला नव्हता. शाळेत येणाऱ्या रस्त्यावर पावसामुळे चिखलाचे साम्राज्य, शाळेतील विद्यार्थ्यांच्या स्वच्छतागृहाचे तुटलेले दरवाजे अशी भयानक अवस्थेत शाळा सुरू होती. शाळेच्या दुरवस्थेबाबत अधिकाऱ्यांशी चर्चा करताच त्यांनी शाळेची पाहणी केली. शाळेत किमान सोयी पुरवल्या गेल्या. शाळेतील गैरसोयींबाबत वारंवार पाठपुरावा करूनही किरकोळ दुरुस्त्या करण्याकडे लक्ष दिले नाही. मात्र, वृत्तपत्रांनी दखल घेताच आवश्यक सोयी मिळाल्या आहेत. शाळेच्या नव्या इमारतीचे बांधकाम प्रगतिपथावर आहे.

शाळेसमोरील क्रीडांगणावर असलेल्या दगडांचा ढिगारा उचलण्यात आला आहे. मुलांच्या आणि मुलींच्या स्वच्छतेचे दरवाजे बसवण्यात आलेले आहेत. शाळेच्या परिसरातील गटारांचे चेंबर दुरुस्त करण्यात आले आहेत.
- श्रीराम जोशी, मुख्याध्यापक, शाळा नंबर ९, अंबरनाथ

अंबरनाथ : पहिल्या छायाचित्रात शाळेसमोर असलेला दगड-मातीचा ढिगारा. दुसऱ्या छायाचित्रात ढिगारा हटवण्यात आला आहे.