रिअल इस्टेट व्यवसायिकाची केली ३२ लाखांची फसवणूक

घर विक्रीच्या नावे बांधकाम व्यावसायिकाची फसवणूक
पनवेलमधील वकिलावर गुन्हा; ३२ लाखांचा गंडा

पनवेल, ता. ९ (बातमीदार) : बनावट कागदपत्रांच्या आधारे एकाच फ्लॅटची दोन वेळा विक्री करून तसेच बँकेकडून घेतलेल्या गृहकर्जाची माहिती लपवत एका वकिलाने बांधकाम व्यावसायिकाची ३२ लाख रुपयांची फसवणूक केल्याचा प्रकार समोर आला आहे. सतीश सदाशिव फडके असे वकिलाचे नाव असून कामोठे पोलिसांनी त्याच्याविरोधात बनावट कागदपत्रांच्या आधारे फसवणूक केल्याप्रकरणी गुन्हा दाखल केला आहे.
पनवेलमधील आदई गावात राहणारे विशाल घोगावकर (४३) यांचा बांधकामाचा व्यवसाय आहे. घोगावकर यांनी ऑगस्ट २०२० मध्ये सतीश फडके यांच्यामार्फत कामोठे सेक्टर २१ येथील उमिया किरण सोसायटीतील फ्लॅट क्र. २०४ विकत घेण्याचा व्यवहार ठरवला होता. या वेळी ॲड. सतीश फडके यांनी या फ्लॅटवर कोणतेही कर्ज नसल्याचे सांगून, तो ३२ लाख रुपयांना विकण्याचे मान्य केले होते. घोगावकर यांनी रक्कम दिल्यानंतर फडकेने १४ ऑक्टोबर २०२० रोजी व्यवहाराचे ॲग्रीमेंट फॉर सेल नोंदवून, फ्लॅटचा ताबा घोगावकर यांना दिला होता; मात्र काही महिन्यांतच फ्लॅटवर आयसीआयसीआय बँकेने थकीत गृहकर्जाची नोटीस पाठवण्यात आली होती. घोगावकर यांनी, चौकशी केल्यानंतर फडकेने संबंधित फ्लॅटवर ३८ लाखांचे गृहकर्ज घेतले असून गृहकर्जाची रक्कम न भरल्याने बँकेची फ्लॅटवर ४५ लाखांची थकबाकी असल्याचे समजले. याशिवाय सोसायटीच्या ना हरकत प्रमाणपत्रासह फडके याने घोगावकर यांना दिलेले इतर दस्तऐवजही बनावट असल्याचे आढळून आले.
विशेष म्हणजे, फडकेने हाच फ्लॅट २०१९ मध्ये निशा आणि विरेंद्रकुमार यादव या पती-पत्नींना विकल्याचे तसेच त्यापोटी १२ लाख रुपये घेतल्याची माहितीही घोगावकर यांना समजली.

प्लॅटचा ताबा बँकेकडे
कामोठेतील ज्या फ्लॅटच्या माध्यमातून सतीश फडकेने फसवणूक केली, त्या फ्लॅटचा ताबा सध्या आयसीआयसीआय बँकेने घेतला आहे. त्यामुळे फडकेने ३२ लाख रुपये परत देण्याचे आश्वासन विशाल घोगावकर यांना दिले होते; मात्र अद्याप रक्कम न दिल्याने अखेर घोगावकर यांनी कामोठे पोलिस ठाण्यात तक्रार दाखल केली. त्यानुसार पोलिसांनी गुन्हा दाखल केला आहे.