गळके छप्पर, दुर्गंधीने प्रवासी हैराण

वाशी, ता. ९ (बातमीदार)ः ट्रान्सहार्बर मार्गावरील प्रवाशांच्या दृष्टीने महत्त्वाचे असलेल्‍या ऐरोली रेल्वेस्थानकात दररोज लाखो प्रवाशांची वर्दळ असते. स्‍थानकाच्या पूर्वेला आयटी पार्क असून मुंबई तसेच उपनगरामधील नागरिक मोठ्या संख्येने कामासाठी येतात; मात्र पावसाळ्यात गळके स्‍थानक, अपुरी आसनव्यवस्‍था, स्‍वच्छतागृहातील दुर्गंधीमुळे प्रवाशांचा जीव मेटाकुटीस येतो.
ऐरोली रेल्वेस्थानकात ठाणे-बेलापूर मार्गाच्या दिशेने असणाऱ्या तिकीट खिडक्या बंदावस्‍थेत आहेत. यामुळे प्रवाशांना पश्चिमेकडे येऊन तिकीट काढावे लागते. स्थानकाच्या पूर्वेस सिडकोकडून भाडेतत्त्‍वावर देण्यासाठी गाळे बांधण्यात आले आहेत; मात्र हे गाळे कधी सुरूच झालेले नाही. रेल्वेस्थानकाच्या शौचालयांची दुरवस्‍था झाली असून दुर्गंधीमुळे प्रवाशांना नाक मुठीत घेऊन प्रवास करावा लागतो.
फलाटावरील आसनव्यवस्‍था कमी असल्यामुळे प्रवाशांना रेल्वेची वाट पाहत ताटकळत उभे राहावे लागते. रात्रीच्या वेळी स्‍थानक परिसरातील दिवे बंद असल्‍याने प्रवाशांना विशेषतः महिलांना असुरक्षित वाटते.

रेल्वेस्थानकाबाहेर रिक्षाचालकांचा वेढा
ऐरोली रेल्वेस्थानकाच्या पूर्व व पश्चिमेच्या प्रवेशद्वारांवर रिक्षाचालकांनी वेढा घातलेली स्थिती असते. त्यामुळे प्रवाशांना स्‍थानकात ये-जा करताना कसरत करावी लागते. सकाळ-संध्याकाळ गर्दी होत असल्‍याने रिक्षाचालकांकडून मनमानी भाडे आकारले जाते. कुठेही रिक्षा उभ्‍या केल्‍या जात असल्‍याने प्रवाशांना नाहक त्रास सहन करावा लागतो.

वाहनतळावर बेवारस वाहने
ऐरोली रेल्वेस्थानकाच्या पे अँड पार्कमध्ये बेवारस भंगार वाहने ठेवलेली दिसतात. तसेच पार्किंग प्लाझाच्या बाहेरही वाहने उभी करण्यात येत असल्‍याने कोंडी होते. खासगी कंपनीच्या बसही याच परिसरात उभ्‍या केल्‍या जात असल्‍याने वाहनतळावर ये-जा करताना चालकांना मनस्‍ताप सहन करावा लागतो. रात्रीच्या वेळी स्‍थानक परिसरात खासगी बस, ट्रक उभे केले जातात, तसेच गर्दुल्यांचाही वावर असतो.

भुयारी मार्गाची दयनीय अवस्था
ऐरोली रेल्वेस्थानकाबाहेरील भुयारी मार्गातील लोखंडी जाळ्या गायब झाल्या आहे. तर पेव्हर ब्लॉक उखडले आहेत. याठिकाणी सिमेंटचे गतिरोधक टाकल्यामुळे वाहने उसळत असल्‍याने चालकांमधून संताप व्यक्‍त होतो. भुयारी मार्गात रात्री बहुतांश वेळी वीज गायब असते.

रेल्वेस्थानकामधील शौचालयामध्ये साफसफाई होत नसल्‍याने दुर्गंधी पसरते. स्थानकाबाहेर अस्ताव्यस्त पद्धतीने रिक्षा उभ्‍या असल्‍याने प्रवाशांना मार्गक्रमण करताना अडथळा निर्माण होतो.
- तृप्ती मोरे, प्रवासी

ऐरोलीतील प्रतिदिन वर्दळ
प्रवासी संख्या ४२ ते ४५ हजार
तिकीटविक्री ११ ते १३ हजार
रेल्वेला महसूल तीन ते साडेतीन लाख