जोगेश्‍वरीत झोपडीधारकांसाठी अभय योजना मार्गदर्शन शिबिर

जोगेश्‍वरीत झोपडीधारकांसाठी अभय योजना मार्गदर्शन शिबिर
एसआरए अधिकारी उपस्थित राहणार
जोगेश्‍वरी, ता. ९ (बातमीदार) ः राज्‍य सरकारने झोपडपट्टी पुनर्वसन योजनेतील १ जानेवारी २०११ पूर्वी निर्गमित केलेल्या अंतिम परिशिष्ट-२ मधील झोपडीचे हस्तांतरण खरेदी-विक्री करणाऱ्या झोपडीधारकांसाठी एकवेळची अभय योजना राबवण्याचा निर्णय घेतला आहे. याची माहिती नागरिकांना देण्यासाठी दत्ताराम गोविंद वायकर स्‍मृती सभागृह, इच्‍छापूर्ती गणेश मंदिर, जोगेश्‍वरी-विक्रोळी लिंक रोड, जोगेश्‍वरी पूर्व येथे शुक्रवारी (ता. ११) सकाळी ११ वाजता अभय योजना मार्गदर्शन शिबिर पार पडणार आहे.
खासदार रवींद्र वायकर यांनी हे शिबिर भरवण्यासाठी पुढाकार घेतला आहे. झोपडपट्टी पुनर्वसन प्राधिकरण, बृहन्मुंबई येथील संबंधित उपजिल्हाधिकारी तथा सक्षम प्राधिकारी व अभियांत्रिकी विभागातील अभियंते उपस्थित राहणार आहेत. झोपडीधारकांना त्यांच्याच परिसरात सुविधा उपलब्‍ध व्‍हावी, यासाठी शिबिराची योजना आखण्यात आली आहे. जास्‍तीत जास्‍त नागरिकांनी शिबिराचा लाभ घ्‍यावा, असे आवाहन खासदार रवींद्र वायकर यांनी केले आहे.