मुंबई बाजारात लखनवी लंगडा आंबा दाखल

मुंबईत लखनवी लंगडा आंबा दाखल
बाजारात ५५ ते ६० रुपये प्रतिकिलोपासून सुरू
जुईनगर, ता. ९ (बातमीदार) : सध्या जवळपास वर्षभर आंब्याचा मोसम चालू असतो. त्यात प्रामुख्याने फेब्रुवारी महिन्यापासून सुरू झालेला आंबा मोसम अद्यापही आहे. मुंबईच्या बाजारात लखनवी लंगडा आंबा दाखल झाला आहे.
हापूस, पायरी, केशर, दशेरी, नीलम, बदामी, राजापुरी, तोतापुरी अशा विविध जातींचे आंबे एकामागोमाग बाजारात येतच असतात. महाराष्ट्रात जसा देवगडचा हापूस तसा उत्तर भारतातील लखनवी लंगडा आंबा प्रसिद्ध आहे. गेल्या आठवड्यापासून हा लखनवी लंगडा आंबा बाजारात दाखल झाला आहे. उत्तर भारतात या आंब्याला चांगलाच मान असून मोठ्या प्रमाणात मागणी असते. सध्या मुंबईतदेखील या आंब्याला मागणी वाढू लागल्याचे सांगण्यात येत आहे.
महाराष्ट्रासह कर्नाटकातदेखील लखनवी लंगडा जातीच्या आंब्याचे उत्पादन घेतले जाते; मात्र या दोन्ही ठिकाणच्या आंब्याचा मोसम संपताच लखनवी लंगडा आंबा बाजारात येतो. या आंब्याचा दर बाजारात ५५ ते ६० रुपये प्रतिकिलोपासून सुरू आहे. हा लखनवी लंगडा अर्धा किलोहून अधिक वजनाचा एक नग असतो. आंब्याला बाजारात चांगलीच मागणी असून इतर आंब्यापेक्षा खाण्यास हा आंबा चवदार असतो. बाजारात विविध आंब्याच्या सरासरी ५० ते ६० गाड्या येत असतात. त्यातील २० ते २५ गाड्या लखनवी लंगडा आंब्याच्या बाजारात येत आहेत. एका कॅरेटमध्ये जवळपास २४ ते २५ किलो आंबे असतात. जवळपास १५ ऑगस्टपर्यंत या आंब्याचा मोसम चालतो, अशी माहिती व्यापारी अविनाश हिंगे यांनी दिली.