डोंबिवलीत प्रथमच जनता दरबार

सकाळ वृत्तसेवा
डोंबिवली, ता. ९ : दर महिन्याच्या दुसऱ्या मंगळवारी महापालिकेच्या मुख्यालयातील आयुक्त दालनात जनता दरबार भरवण्यात येतो. आता डोंबिवलीतील नागरिकांना विशेषत: ज्येष्ठांना जनता दरबारात समक्ष उपस्थित राहून आयुक्तांसमोर समस्या मांडता याव्यात, यासाठी प्रथमच आयुक्तांचा जनता दरबार डोंबिवलीत पीपी चेंबर येथे फ प्रभाग कार्यालयाच्या इमारतीत भरवण्यात आला. या वेळी सुमारे ७५ ते ८० नागरिकांनी जनता दरबारात उपस्थित राहून आपल्या समस्या आयुक्त व अधिकाऱ्यांसमोर मांडल्या. समस्यांवर चर्चा करून त्यांचे त्वरित निराकरण करण्याबाबतचे निर्देश आयुक्तांनी यावेळी संबंधित अधिकाऱ्यांना दिले.
डोंबिवलीत प्रथमच जनता दरबार भरवण्यात आला होता. बेकायदा बांधकाम, पाणी समस्या यावेळी नागरिकांनी आयुक्तांसमोर मांडल्या. अनधिकृत बांधकामे होऊ नये, यासाठी सर्व प्रभाग अधिकाऱ्यांना सक्त सूचना देण्यात आल्या आहेत. असे बांधकाम होताना दिसले, तर त्यावर कठोर कारवाई करण्याचे आदेश दिले आहेत. महापालिका रुग्णालये, नागरी आरोग्य केंद्र यांच्यामध्ये सुधारणा करण्यासाठी प्रयत्नशील असून, केंद्र सरकारच्या नॅशनल कॉलिटी इन्शु‍रन्स स्टँडर्ड आणि कायाकल्प या प्रकल्पांतर्गत/सेवांतर्गत नागरी आरोग्य केंद्रे व महापालिका रुग्णालये यांच्या कार्यप्रणालीबाबत कालबद्ध नियोजन करण्यात येत आहे. येत्या कालावधीत अधिक दर्जेदार सुविधा देण्याचा आपण प्रयत्न करू, अशी माहिती आयुक्त अभिनव गोयल यांनी योवळी बोलताना दिली.

स्थानक परिसराची पाहणी
पालिकेचे फेरीवाला पथक योग्य पद्धतीने कारवाई करत नाही. स्थानक परिसरात १५० मीटरच्या आत फेरीवाले बसलेले असतात. फेरीवाला पथकातील कर्मचारी दुसऱ्या प्रभागात बदली होऊन जुन्या प्रभागात वर्षानुवर्षे ठाण मांडून आहेत. कर्मचारी, प्रभाग अधिकारी यांचे साटेलोटे असून, फेरीवाल्यांकडून जोरदार हफ्ते वसुली केली जात असल्याची तक्रार आयुक्तांच्या कानी गेली. यावर जनता दरबार झाल्यानंतर आयुक्त अभिनव गोयल यांनी अतिरिक्त आयुक्त योगेश गोडसे तसेच इतर अधिकाऱ्यांसमवेत थेट चालत डोंबिवली स्थानक परिसराची पाहणी केली. स्थानक परिसरात फेरीवाले व्यवसाय करत असल्याचे आढळून आले. आयुक्त येताच कर्मचारी तसेच फेरीवाल्यांची एकच धांदल उडाली.