गुरुपौर्णिमेनिमित्त गुलाब फुल महागले

डोंबिवली, ता. ९ (बातमीदार) : गुरुपौर्णिमा हे भारतात गुरू-शिष्य परंपरेचे प्रतीक मानला जाणारा पवित्र सण आहे. या दिवशी शिष्य आपल्या गुरूंचे फुलांद्वारे आदर आणि कृतज्ञता व्यक्त करतात. गुलाबफुल हे गुरूप्रती भावना व्यक्त करण्याचे एक महत्त्वाचे साधन आहे. यासाठी गुरुपौर्णिमेनिमित्त गुलाब फुलांची मागणी प्रचंड वाढली आहे. सध्या डोंबिवलीतील बाजारात १० ते १५ रुपयांना विकले जाणारे एक फूल २५ रुपयांवर पोहचले आहे.
गुरुपौर्णिमा साजरी करण्यासाठी शाळा, महाविद्यालये, क्लासेसमध्ये मोठ्या प्रमाणावर कार्यक्रम घेतले जातात. अनेक ठिकाणी विद्यार्थ्यांकडून गुरूंना गुलाब, बुके, वॉलपेपर व इतर भेटवस्तू दिल्या जातात. सध्या गुरुपौर्णिमेनिमित्त बाजारात गुलाबफुलांची मागणी वाढली आहे. मात्र, दरवाढीमुळे अनेक विद्यार्थी आणि पालकांनी भेटवस्तूंचा पर्याय निवडला आहे. यामध्ये हस्तनिर्मित ग्रीटिंग कार्ड्स, डायरी, पेन, बुकमार्क्स, छोटे शोपीस, ध्यानयोगासंबंधित साहित्य, तसेच वॉल पेंटिंग्स यांचा समावेश आहे. गुलाबफुलांच्या किमतीत २५ ते ३० टक्क्यांपर्यंत वाढ झाली आहे. साधारणतः जे लाल गुलाब दररोज १० ते १५ रुपये प्रति फूल विकले जात होते, तेच आता २० ते २५ रुपयांवर पोहोचले आहेत. मोठ्या आकाराचे आणि आकर्षक गुलाब ३० ते ३५ रुपयांपर्यंत विकले जात आहेत.

नोंदवहीची गुरुदक्षिणा
प्रत्येकजणांसाठी नोंदवही फार महत्त्वाची असते. यामध्ये दैनंदिन जीवनातील महत्त्वाच्या घटना, गोष्टी नोंद करता येतात. यासाठी अनेक जण गुरूंना नोंदवही आणि पेन भेटवस्तू म्हणून देत असतात.

हस्तनिर्मित कार्ड्स
अनेक जण आपल्या आईला गुरू मानतात. तर काही जणांचे आदर्श व्यक्ती असते. त्यांच्या आठवणीत आपण राहावे यासाठी हस्तनिर्मित कार्ड्स तयार करतात. यामुळे गुरुजण किंवा आई यांचा आनंद द्विगुणित होतो.

तीन दिवसांपासून गुलाबाची मागणी खूप वाढली आहे. शाळा आणि महाविद्यालयांमध्ये गुरुपौर्णिमा कार्यक्रमासाठी विशेष ऑर्डर्स येत आहेत. त्यामुळे आम्ही फुलांची साठवणूक आधीच वाढवली होती; पण तरीही पुरवठा कमी पडत आहे.
- वरून कदम, विक्रेता

दर वर्षी मी माझ्या शिक्षिकेला एक गुलाब आणि छोटा बुके देते. पण यावर्षी फुल खूप महाग झाले आहेत. तरीही हा दिवस असा आहे की, श्रद्धेने दिलेली गोष्ट महत्त्वाची आहे.
- श्रेया वाघमारे, विद्यार्थिनी