डॉक्टरच्या खात्यातून ८८,७९० रुपये लंपास

पनवेल, ता. ९ (वार्ताहर) : सायबर चोरट्याने पनवेलमधील एका डॉक्टरला भारतीय टपाल या नावाने लिंक पाठवून त्यांच्या डेबिट कार्डची माहिती घेत, बँक खात्यातून ८८,७९० रुपये लांबवल्याचे उघडकीस आले आहे. पनवेल शहर पोलिसांनी याप्रकरणी गुन्हा दाखल केला आहे. तसेच त्याचा शोध सुरू केला आहे.
तक्रारदार डॉक्टर पनवेलमधील तक्का भागात राहतात. ४ जुलैला सायंकाळी एका सायबर चोरट्याने डॉक्टरला संदेशातून पॅकेज डिलिव्हरीबाबत एक लिंक पाठवली. डॉक्टरला वेळोवेळी पार्सल येत असल्याने त्यांनी लिंक उघडली असता, भारतीय टपाल या नावाने एक बनावट वेबसाईट उघडली गेली. त्यात २५ रुपये भरण्याचे कारण देऊन संपूर्ण माहिती भरण्यास सांगण्यात आले. डॉक्टरने स्वत:ची तसेच डेबिट कार्डची संपूर्ण माहिती भरल्‍यावर ओटीपी टाकला. त्यानंतर डॉक्टरने दुसरा ओटीपीसुद्धा टाकल्यानंतर त्यांना खात्यात कमी शिल्लक असल्याचा संदेश आला. त्याचवेळी त्याच्या खात्यातून ८८,७९० काढल्याचा मेसेज बँकेकडून प्राप्त झाला.
आपल्या खात्यातून कुणीतरी रक्कम काढल्‍याचे लक्षात येताच डॉक्टरने तत्काळ बँकेत संपर्क साधून आपले अकाउंट व डेबिट कार्ड ब्लॉक करून घेतले. त्यानंतर त्यांनी प्रथम गुन्हे शाखेच्या हेल्पलाइनवर संपर्क करून तक्रार नोंदवली. नंतर पनवेल शहर पोलिस ठाण्यात तक्रार दाखल केली. त्यानुसार पोलिसांनी सायबर चोरट्याविरोधात गुन्हा दाखल केला.

अनोळखी लिंकपासून सावधानतेचा इशारा
दरम्यान, नागरिकांनी कोणत्याही अनोळखी लिंकवर क्लिक करू नये तसेच आपल्या बँक खात्याची माहिती, ओटीपी, सीव्हीव्ही कोणी विचारल्यास देऊ नये. अनोळखी क्रमांक आलेल्या मेसेजवरील लिंकवर क्लिक करू नये, असे आवाहन पोलिसांकडून करण्यात आले आहे.