खवय्यांची चविष्ट पौष्टिक मक्याकडे धाव

खवय्यांची चविष्ट पौष्टिक मक्याकडे धाव
ग्राहकांना आकर्षित करण्यासाठी नवनवीन फंडे
वसई, ता. ९ (बातमीदार) ः पावसाचा आनंद लुटताना गरमागरम मका खाण्यासाठी खवय्ये विक्रेत्यांकडे धाव घेऊ लागले असून त्यांना आकर्षित करण्यासाठी नवनवे फंडे वापरू लागले आहेत. यामुळे मका विक्री तेजीत आल्याचे वसईत दिसत आहे.
मक्याचे कणीस हे आरोग्यासाठी गुणकारी असतात. यात प्रथिने, लोह, मॅग्नेशियम आदींचा समावेश असतो. पावसाळ्यात विक्रीसाठी मक्याचे कणीस दाखल झाले आहेत. वसई, नालासोपारा, विरारसह महामार्गावर मकाविक्री जोरदार सुरू झाली आहे. त्यातच केवळ लिंबू- मसाला नव्हे तर मक्याच्या कणसाला विविध फ्लेवर दिले जात असल्याने नागरिकांची गर्दी होत आहे. त्यामुळे मकाविक्रेत्यांचा फायदा होत आहे.
पावसाळ्यातील हंगामी व्यवसाय करीत असून त्याला नागरिकांची पसंती मिळत आहे. आमच्या दुकानात मका कणीस भाजून साधे किंवा चीज, बटर, उकडलेले दाणे अशा स्वरूपात नागरिकांच्या मागणीनुसार दिले जातात, असे विक्रेते तानाजी जावळे यांनी सांगितले.

चीज, बटर मका
मका भाजून त्याला लिंबू, मसाला लावून पूर्वी खाल्ला जात होता; मात्र आता मका विक्रेत्यांनी शक्कल लढवली आहे. चीज, बटर मका, उकडलेले दाणे व त्याला फ्लेवर व भाजलेले मक्याचे कणीसदेखील उपलब्ध होत आहेत. त्यामुळे नागरिकांची मागणीदेखील वाढू लागली आहे.

वसई : पश्चिमेकडील सनसिटी सोपारा मार्गावर कणीस विक्रेते दाखल झाले आहेत.