कर्करोगग्रस्त महिलांसाठी अर्थसाहाय्य

कर्करोगग्रस्त महिलांसाठी अर्थसहाय्य
पनवेल महापालिकेकडून ५० हजारांची मदत; आतापर्यंत ३२ रुग्णांना लाभ
नवीन पनवेल, ता. ९ (बातमीदार) ः पनवेल महापालिकेच्या महिला व बालकल्याण विभागाकडून शहरातील कर्करोगग्रस्‍त महिलांना आर्थिक मदत देण्यात येत आहे. या उपक्रमाचा लाभ आतापर्यंत ३२ महिला रुग्णांनी घेतला आहे. २०२१-२०२२ पासून कर्करोगग्रस्त महिलांना रोख रक्कम देण्याची योजना पनवेल महापालिकेत सुरू झाली आहे. या अर्थसहाय्यातून अनेक गरीब महिला रुग्णांना नवसंजीवनी मिळाली आहे.
सध्या व्‍यग्र जीवनशैलीमुळे कर्करोगाचे प्रमाण दिवसेंदिवस वाढत चालले आहे. त्‍यातही या आजाराचे प्रमाण महिलांमध्ये जास्त आहे. स्तनासह गर्भाशय मुखाचा कर्करोग महिलांमध्ये मोठ्या प्रमाणात आढळू लागला आहे. या आजाराचे निदान झाल्यानंतर कुटुंबीयांसमोर मोठे संकट उभे राहते. अशा महिलांच्या मदतीसाठी महिला व बालकल्याण विभागातर्फे ५० हजार रुपयांपर्यंत अर्थसहाय्य दिले जात आहे. पनवेल महापालिकेतर्फे मागील तीन वर्षांत आतापर्यंत ३२ महिलांना या योजनेतून लाभ मिळाला आहे. शिवाय याबाबत जनजागृती करण्यात येत असल्याची माहिती महिला व बालविकास विभागातर्फे देण्यात आली आहे. त्यांच्या उपचारासाठी आर्थिक मदत व्हावी, हा त्‍यामागील मूळ उद्देश आहे. सुरुवातीला ही मदत २५ हजार रुपये होती; परंतु त्यानंतर गेल्या वर्षापासून या योजनेच्या अनुदानात दुपट्ट वाढ करून ती ५० हजार रुपयांवर करण्यात आली आहे. कर्करोगाचे निदान झाल्यानंतर रुग्णासह कुटुंबीयांचे मनोबल खचते. त्यातही उपचारासाठी मोठ्या प्रमाणात खर्च येतो. त्‍यामुळे अशा गोरगरीब महिलांना कर्करोगाच्या आजारात आर्थिक हातभार लागावा, यासाठी महापालिकेच्या माध्यमातून हा उपक्रम राबविला जात आहे.
..................
असा करावा अर्ज
पनवेल महापालिका हद्दीत राहणाऱ्या महिलेला कोणत्याही कर्करोगाचे निदान झाले असेल, तर त्यानंतर या योजनेतून लाभासाठी अर्ज करता येणार आहे. त्यासाठी संबंधित नमुन्यातील अर्ज, फोटो, पनवेल महापालिका हद्दीत तीन वर्षे वास्तव्याचा पुरावा, कर्करोगाचे निदान झाल्याचा दाखला, उपचार घेत असलेल्या रुग्णालयाचे प्रमाणपत्र, बँकेच्या पासबुकची झेरॉक्स प्रतसह अर्ज महिला व बालकल्याण विभागाकडे जमा करणे गरजेचे आहे.
......................
चौकट
वर्ष लाभार्थी
२०२१ -२२ ८
२०२२-२३ ९
२०२३-२४ १
२०२४-२५ १५