उरण तालुक्यात भातशेतीच्या लावणीला सुरुवात

उरण तालुक्यात भातशेतीच्या लावणीला सुरुवात
उरण, ता. ९ (वार्ताहर) ः तालुक्यात यंदा पावसाने चांगली हजेरी लावली आहे. त्‍यामुळे भाताची रोपे योग्यप्रकारे वाढल्याने लावणीला सुरुवात झाली आहे.
या वर्षी मेमध्ये चक्रीवादळासह पाऊस झाला. त्यानंतर त्‍याने चांगलीच दडी मारली; मात्र जूनमध्ये समाधानकारक पाऊस झाला. त्‍यामुळे तालुक्‍यातील भातशेती ओलिताखाली आली. त्‍यामुळे शेतकऱ्यांमध्ये समाधानाचे वातावरण निर्माण झाले आहे. भाताचे कोठार म्हणून ओळखल्या जाणाऱ्या उरण पूर्व विभागातील शेतकरी मोठ्या प्रमाणात मशागतीला लागले आहेत. रोपे तयार झालेल्या शेतकऱ्यांनी लावणीला जोरदार सुरुवात केली आहे. त्यामुळे भाताची रोपे करपणे, अतिवृष्टी होऊन पाण्याखाली जाऊन कुजणे अशा संकटातून यंदा तालुक्‍यातील शेतकऱ्यांची सुटका झाली आहे. यंदा भाताच्या उत्पादनात वाढ होणार असल्याचे जाणकार शेतकऱ्यांकडून बोलले जात आहे. त्यामुळे आजच्या परिस्थितीत वाढती मजुरी, महागडे बियाणे, खते यामुळे न परवडणारी शेती कसदार बनविण्यासाठी शेतकरी पुढे सरसावत आहेत. नांगरणीसाठी बैलांचा नांगर आता कालबाह्य झाला असून, सर्रास पॉवर टिलर यंत्राच्या साहाय्याने नांगरणी करण्यात येत आहे. त्याचप्रमाणे वाढलेली मजुरी, तुटवडा यामुळे घरातील मंडळी शेतीच्‍या कामाला लागली आहेत.