‘अदाणी हटाव देश बचाव’

सकाळ वृत्तसेवा
ठाणे, ता. ९ : महावितरणचे खासगीकरण करण्याच्या निर्णयाला तसेच वीजग्राहकांसाठी स्मार्ट तथा प्रीपेड मीटर बसवण्यास नागरिकांचा विरोध असल्याने ठाणे काँग्रेसच्या वतीने बुधवारी महावितरणच्या वागळे येथील मुख्य कार्यालयासमोर निषेध आंदोलन करण्यात आले. या वेळी आदोलकांनी ‘अदाणी हटाव देश बचाव’, अशी जोरदार घोषणाबाजी केली.
भिवंडी, कळवा, मुंब्रा आणि दिवा भागात सेवा देणाऱ्या टोरंट आणि अदाणी या खासगी वीज कंपन्यांविरोधात ग्राहकांमध्ये प्रचंड रोष असताना ठाणे, नवी मुंबई, पनवेल आदी भागात सार्वजनिक वीज वितरणासाठी अदाणी कंपनी पुढे आलेली आहे. वीज वितरणाच्या खासगीकरणाकडे जाणारा मार्ग असल्याने नागरिकांमध्ये असंतोष आहे. या क्षेत्रात काही ठरावीक भांडवलदार कंपन्यांना प्रवेश दिल्याने घरगुती वापर करणाऱ्या ग्राहकांवर अधिक बोजा पडू शकतो. त्यामुळे राज्य सरकारने वीज कंपनीचे खासगीकरणाचे धोरण रद्द करावे, यासाठी आंदोलन करण्यात आले.